Хуульчид нэгдэж Үндсэн хуулийн цэцэд хандана

Юун түрүүн хаврын морин уралдааныг өвөл, хаврын гэж хамтад нь ярьж, ойлгож байгаагаа УИХ-ын гишүүн Х.Баасанжаргал ярилаа. Учир нь хавар 3 дугаар сард зохион байгуулах морины уралдааны бэлтгэл өвөл эхэлдэг. Морины сунгаа, асаргаа маллагаа гээд бүх ажил өвлөөс өрнөж, хүүхдүүд голдуу ажилладаг гэлээ. Мөн “Засгийн газрыг хүүхдийн эрхийг хөсөр хаяж, уяачдыг дэмжсэн шийдвэр гаргана гэж бодоогүй. Энэ бол хууль зөрчсөн үйлдэл. Гэхдээ шийдвэрийг бичгээр баталгаажуулахад 14 хоногийн хугацаа бий. Тиймээс миний итгэл найдвар хараахан тасраагүй. Ерөнхий сайд шийдвэрийг битгий хүлээж аваасай гэж хүсч байна. Энэ хугацаанд үйл явц өрнөсөөр цагаан сартай давхцаж уралдаан болж болзошгүй нөхцөл бүрдчихлээ” гэлээ.

ӨВ СОЁЛ, УЯАЧИД ГЭДЭГ МАЛГАЙН ДОР ИМПОРТЫН АЗАРГАНЫ БИЗНЕС ЭРХЛЭГЧДИЙН ЭРХ АШИГ ЯВААД БАЙНА ГЭВ

Хуульч, өмгөөлөгч С.Халиунаа “Миний бие хүүхдийн төлөө үндэсний газар 2013 онд ажиллаж байхдаа морин уралдаан дээр биечлэн ажиллаж байсан. Түүнээс хойш хувиараа мэргэжлээрээ ажиллаж байна. Хуульчдын хувьд шүүхийн шийдвэр бол тухайн асуудлаар гаргасан хууль. Засгийн газар өөрийнхөө гаргасан тогтоолоосоо буцаж, шүүхийн шийдвэр зөрчиж, Монгол Улсын Үндсэн хууль зөрчиж, тогтоолоо өөрчлөхдөө дуу хоолойгоо хүргэх чадамжгүй, эрсдэл тооцоолох чадваргүй, хамгийн эмзэг бүлэг хүүхдийн эсрэг шийдвэр гаргалаа. Хүүхдийн эрхийн зөвлөлийн тэргүүн нь байдаг хүмүүс ингэж өөрчилж байгаа нь Монгол Улс хүн төрөлхтөний ололт амжилтаас ухарлаа.” гэлээ.

Мөн тэрээр өв соёл гэдэг малгайн дор импортын азарганы бизнес эрхлэгчдийн эрх ашиг яваад байна гэж хардаж байгаагаа мэдэгдэв. “Жагсаал зохион байгуулсан хүмүүс бол импортын азарганы бизнес эрхлэгчид. Тэдний амьдралын хэв маяг нь малчин биш, бизнесийн зарчмаар ажиллаж буй худалдаа эрхлэгчид. Гэтэл нөгөө талд монгол малынхаа удмыг авч яваа, малаа зүсэлж таньдаг, нутгийнхаа малын удмыг хөгжүүлдэг монгол малчид бий. Үүнийг ялгаж салгах хэрэгтэй байна” гэлээ.

Өмгөөлөгч С.Халиун “Тус жагсаалын бэлтгэл УИХ-ын сонгуулийн өмнө эхэлсэн болов уу. Орон нутгийн удирдлагуудаасаа илүү эрх мэдэл, капиталтай болчихсон хүмүүс бүр Засгийн газарт нөлөөлж чадаж байна. Засгийн газар шүүхийн шийдвэр нь гарчихсан стратегийн өмгөөлөл гэдэг нийтийн ашиг сонирхлын хамгийн том ахиц дэвшил болсон Захиргааны ерөнхий хуулиар батлагдсан шийдвэрийг өөрчлөөд дахиад тогтоол гаргаж байна. Шүүх засаглал руугаа турхирч буй энэ үйл явц, үйлдэл хуульчдын, ялангуяа шүүх засаглалаа өмгөөлж хамгаалж байгаа хуульчдын хувьд их эмзэг тусч байгаа. Энэ бол хууль дээдлэх ёс, Үндсэн хуулийг үгүйсгэж байгаа асуудал. Үүний тод жишээ. Тиймээс ч хуульчид хэсэг бүлгээрээ нэгдэж байна. Засгийн газрыг Үндсэн хуулийн цэцэд өгнө. Хуулийн хувьд ч гаргалгаа бий. Нэгдүгээрт Захиргааны хэргийн шүүхэд хандаад Засгийн газрын актыг түдгэлзүүлэх, эсвэл Үндсэн хуулийн цэцэд өгч болно. Гэвч Засгийн газрын тогтоол бичгээр гарах гэж хугацаа явж байхад нөгөө талд аль хэдийн морин уралдаандаа бэлтгээд эхэлчихсэн байгаа” гэлээ.