Ухаалаг фирм байгуулахад Хятадын засгийн газраас 2 сая юанийн хөрөнгө оруулалт хийжээ

“Шинэ хөдөө” хоёр орны сэтгүүлчдийн хамтарсан сурвалжлагын хүрээнд үржил сайтай хонины фирмтэй танилцсан юм. ӨМӨЗО-ны Хянган аймгийн Хорчин баруун гарын өмнөд хошууны Зүрхэн суманд байрладаг МүСэн фирм нь Хүян хэмээх сайн үүлдрийн хонь үржүүлдэг.

Уг үүлдрийн онцлог нь жилийн дөрвөн улиралд ороо орж, эм хонь нь 2 жилд 3 удаа хургалах бөгөөд 2-3 ихэрлэдэг, 8-9 сарын дараа 42.5 кг-аас дээш жинтэй болох үед хээлтүүлэг хийх боломжтой болдог давуу талтай, мөн сүүний гарц сайтай юм байна.

Уг фирм байгуулж, хөгжүүлэх төсөлд төр засгаас 2 сая юанийг олгожээ. Тодруулбал, эхний ээлжинд фирмээ байгуулсны дараа тодорхой шалгуурыг хангасны үндсэн дээр ухаалаг систем нэвтрүүлэхэд нь энэ хэмжээний хөрөнгө оруулалтын дэмжлэг үзүүлсэн байна. Ингэснээр 2020 онд анх 1800 хониор эхлүүлж, өдгөө 30 мянга болон үржсэн фирмийг ухаалаг системээр хянахын зэрэгцээ хүний хөдөлмөрийг хөнгөвчилсөн нөхцөл бололцоо бүрджээ.

Одоогоор тус фирм нь 5000 хонь худалдан борлуулж, 25 мянган хоньтой бөгөөд нийт 12 тонн хөх дарш, 1 хонь өдөрт 3.8 кг өвс тэжээл хэрэглэдэг хэмээн фирмийн дарга Ян Бө бидэнд танилцуулсан юм.

Энэ нь нутгийн тариаланчдын эдийн засагт чухал нөлөөтэй тул үржлийн чиглэлээр үйл ажиллагаа явуулж буй фирмд үзүүлсэн төр засгийн дэмжлэг тариалангийн салбарын эдийн засагт ч чухал нөлөө үзүүлж буйг харуулж байлаа.

/10 сартай хурганууд, амьдын жин 50-55кг/