2027 оны төсөвт мэдээлэл сурталчилгааны зардалд ₮26.4 тэрбум тусгажээ: өнөө жилээс ₮8.9 тэрбумаар өснө

Зураг (тайлбар): Улаанбаатар дахь Төрийн ордон (Засгийн газрын ордон). Зохиогч: xiquinhosilva / Wikimedia Commons, CC BY 2.0

Засгийн газраас УИХ-д өргөн мэдүүлсэн 2027 оны төсвийн төсөлд мэдээлэл сурталчилгааны зардалд ₮26.4 тэрбум төгрөг тусгажээ. Төсвийн төслийн хоёр дахь хэлэлцүүлгийг одоо УИХ-ын холбогдох байнгын хороод явуулж байна.

Төсвийн төслөөр 2027 оны нэгдсэн төсвийн нийт зарлагыг ₮43.5 их наяд төгрөг байхаар тооцсон нь нэрлэсэн ДНБ-ий 37.8 хувьтай тэнцэнэ. Үүнээс урсгал зардал ₮33.5 их наяд бөгөөд 2026 оны төсвөөс ₮7.5 их наядаар нэмэгдэхээр байна.

Урсгал зардлын "бараа үйлчилгээний бусад зардал" гэсэн ангилалд ₮713 тэрбум төсөвлөсөн. Үүний ₮627.4 тэрбумыг төрийн байгууллагуудын бараа үйлчилгээний бусад зардалд, ₮59.7 тэрбумыг сургалт дадлага бэлтгэлд, ₮26.4 тэрбумыг мэдээлэл сурталчилгаанд зарцуулахаар тусгажээ.

Мэдээлэл сурталчилгааны зардал энэ онд ₮17.4 тэрбум байгаа бол 2027 онд ₮8.9 тэрбумаар нэмэгдэж, бараг 1.5 дахин өсөх юм. Эх үүсвэрээр нь авч үзвэл ₮9.3 тэрбумыг улсын төсвөөс, ₮15.8 тэрбумыг орон нутгийн төсвөөс, ₮1.2 тэрбумыг Нийгмийн даатгалын сангийн төсвөөс гаргахаар төсвийн төсөлд тусгасан байна.

Сангийн яамны тайлбар

Сангийн яамны Төрийн нарийн бичгийн дарга М.Санжаадорж энэ зардлын чиглэлийг тайлбарлахдаа, мэдээлэл сурталчилгааны зардал нь хууль тогтоомжийг хэрэгжүүлэх, хууль сурталчлах зорилгоор зарцуулагддаг гэжээ. Төрийн хэмнэлтийн тухай хуульд ийм зардал гаргах зохицуулалт заасан гэдгийг тэрээр дурдсан.

Түүний хэлснээр энэ зардал байгууллага бүрд байдаггүй, харин тодорхой байгууллага хууль сурталчлах хэрэгцээгээ тооцон санал ирүүлснээр төсөвт тусгагддаг. Жишээлбэл УИХ-ын гишүүд баталсан хуулиа сурталчлах саналаа ирүүлдэг бол Ашигт малтмал, газрын тосны газарт ийм төрлийн зардал байдаггүй аж. Зардлын гүйцэтгэл нь хэвлэл мэдээллийн байгууллагуудтай гэрээ байгуулах хэлбэрээр хэрэгждэг бөгөөд ₮20 саяас дээш гэрээ байгуулахад хуулийн дагуу тендер зарлах ёстой.

Тоон харьцуулалтаар ₮26.4 тэрбум нь нэгдсэн төсвийн нийт зарлагын ойролцоогоор 0.06 хувьтай тэнцэж байна. Энэ зардлын хэмжээ, хуваарилалтыг байнгын хороод хэлэлцүүлгийн явцад хэрхэн шийдэхийг УИХ-ын чуулганы хэлэлцүүлгээс харах болно.