60 төгсөгч ажлын байрны урилга хүлээн авлаа

Монгол-Солонгосын Политехник коллеж “Job Fair 2024” ажлын байрны өдөрлөгөө 12 сарын 25-ны өдөр зохион байгууллаа.

2024-2025 оны хичээлийн жилийн өвөл тус сургуулийг гагнуурчин, мужаан, цахилгаанчин, сэргээгдэх эрчим хүч, авто машины засварчин, оёдол, сүлжих, арьс шир, хэвлэлийн график дизайн зэрэг 13 мэргэжлээр 425 залуус суралцан төгсөж дипломоо гардан авч байна. Төгсөгчдийг шууд ажлын байранд жуучлах зорилготой зохион байгуулсан “Job Fair 2024” өдөрлөгт нийслэлийн Хөдөлмөр, халамжийн газар, ХУД-ийн хөдөлмөр, халамж үйлчилгээний хэлтэс, Монголын хөдөлмөрийн биржүүдийн нэгдсэн холбоо, “Говь” ХК, Кашмер холдинг ХХК, АПУ ХХК, “Вест шүүс” ХХК, “Энержи комплекс” ХХК зэрэг 35ажил олгогч оролцлоо.

Өдөрлөгөөр ажил олгогчид 500 орчим нээлттэй ажлын байраа танилцуулсан бол цагийн болон байнгын ажлын байрны анкетыг 200-ААД төгсөгч бөглөлөө. Мөн 60 гаруй төгсөгч “Говь” ХК, “Кашмер” холдинг ХХК, “Гоёл кашмер” ХХК, “Вест шүүс” ХХК, “Говь эрдэнэ” кашмер ХХК, “Улаанбаатар хивс” ХК, “Санширо” ХХК, “Өнгөт сор” ХХК-уудаас ажлын урилга гардаж авлаа.

Монгол-Солонгосын Политехник коллеж төгсөгчдөдөө “Ажлын байр ба харилцаа” сэдвээр сургалт орж, суралцагчдынхаа үзэсгэлэнг дэлгэсэн нь онцлог байлаа.

Хөдөлмөрийн зах зээлийн эрэлтийн 2023 оны судалгаагаар хөдөлмөрийн зах зээлд дээд боловсролын ажил мэргэжлийн эрэлтээс илүү мэргэжлийн боловсрол, сургалтын байгууллагаар бэлтгэгддэг ажил мэргэжлийн эрэлт өндөр байна.Энэ хандлага сүүлийн 10 жил тогтмол хадгалагдсаар байгааг багш, ажил олгогчид танилцуулж байлаа.

Тодруулбал гагнуурчин, мужаан, цахилгаанчин, сэргээгдэх эрчим хүч, авто машины засварчин, оёдол, сүлжих, ээрэх, арьс шир зэрэг ажил мэргэжил жил бүрийн эрэлттэй мэргжлийг тэргүүлж байна.