Ноорогийг “хувь хүний нууцыг задруулах, цахим мөрийтэй тоглоом зохион байгуулах” сэжүүрээр шалгагдаж байгаа гэж ЦЕГ-аас мэдээллээ

Баримт шалгалтын үр дүн

Ноорог студи нь Эм Си Эс компанийн тролл баг байсныг тогтоосон гэх мэдээлэл байхгүй бөгөөд ЦЕГ-аас үүнийг үгүйсгэлээ.

2024 оны гуравдугаар сарын 18-ны шөнө Ноорог студийн хамт олныг хууль бусаар саатуулан байцаасан тухай мэдээлэл түгсэн. Энэ үйл явдалтай зэрэгцэн тус студийн хамт олон яагаад саатуулагдсан тухай баримтгүй мэдээлэл онлайн орчинд түгээд байна. Тухайлбал Erennews.mn мэдээлснээр “…өнгөрсөн шөнө хуулийнхан Ноорог.мн сайтад хойшлуулашгүй ажиллагаа явуулж мэдүүлэг тайлбар авч, зарим эд мөрийн баримтыг хурааж авсан гэх мэдээлэл өнөөдөр цацагдлаа. Тэгвэл тэд “Эм Си Эс” группээс санхүүжилт авч, “Ноорог креатив” гэх компаниар халхавч хийж цахим сүлжээнд троллын үйл ажиллагаа явуулж байсан нь тогтоогдсон байна.” гэх мэдээллийг түгээжээ. Мөн үүнтэй ижил агуулга бүхий мэдээллийг хэд хэдэн Facebook хаяг түгээжээ. Тухайлбал Arslan.mn, ReelNews, Bolloo.mn, Hardnews.mn зэрэг хуудаснаас яг ижил агуулга бүхий мэдээлэл түгээсэн байна.

FACTCHECK: Бид дараах байдлаар баримт шалгалт хийлээ.

2025 оны 03 дугаар сарын 18-нд 12:30 минутад Ноорог.мн сайтын ажилтнуудыг саатуулсан хэрэгтэй холбоотой хэвлэлийн бага хурал хийсэн. Уг хурлын үеэр өмгөөллийн Fidelitas Partners ХХН-ийн гүйцэтгэх захирал Б.Наранцэцэг “Иргэнээс гарсан гомдлын дагуу сэжигтнээр мэдүүлэг авсан. Ямар нэг хэрэг бүртгэл одоогоор үүсээгүй байна… Урьд шөнө мэдүүлэг авахдаа 19.9.1-ээр гэж өөрсдөд нь мэдэгдсэн. Гомдол байгаа учраас зүйлчлэл тодорхойгүй… Тодорхой зүйл байхгүй болохоор хэрэг, мөрдөн шалгах үйл ажиллагаатай холбоотой ярих зүйл байхгүй… 12 дугаар сарын 31-ны өдөр төрийн өндөр албан тушаалтан холбоотой meme нийтэлсэн хэмээн дуудсан. Өнөөдөр иргэний гомдлоор дуудсан гэж байна.. Өчигдөр ямар шалтгаанаар дуудсанаа мэдэгдээгүй… Ажлын цаг дууссаны дараа хойшлуулшгүй хэмээн биеэс нь гар утсыг хурааж авсан, оффист нь нэгжлэг хийж, эд зүйлийг хураан авсан. Хаана байгааг нь шууд мэдэж, очиж авсан зэрэг процессын алдаа бий… Ямар ч зөвшөөрөлгүй шөнийн 22:00 цагаас 07:00 хүртэл албан бусаар саатуулах нь хүний эрхийн зөрчил, үүнд хүний эрхийн мэдрэмжтэй хандах ёстой байсан. Найман ажилтныг өглөө 6:30-д явуулсан” хэмээн мэдээлсэн.

Мөн өмгөөлөгч П.Эрхэмбаяр “Эрүүгийн хэрэг хянан шийдвэрлэх тухай хуульд зааснаар процессын хүрээнд ажиллагаа явагдах ёстой. Өчигдөр PC тоглоомын газар тоглож байхад нь цагдаа гэнэт орж ирсэн гэх мэдээлэл өгсөн. Ажлын байран дээр бус pc-нд байж байхад нь очиж авсан нь, тэнд яаж мэдэж очсоныг мэдэхгүй, энэ бол процессын зөрчил… Хоёрдугаарт прокуророос зөвшөөрөл аваагүй, одоо хүссэн байгаа юм. Мөн 48 цагаар баривчилна гэдэг саналыг прокурорт хүргүүлсэн ч Баянзүрх дүүргийн прокурор үүнээс татгалзаж шийдвэрлэсэн. Сая гэрчээр мэдүүлэг өгөх ёстой байсан боловч сэжигтнээр мэдүүлэг өгсөн. Сэжигтнээр мэдүүлэг өгнө гэдэг нь удахгүй ялагдагчаар татах тогтоол танилцуулна. Ялагдагчаар татах тогтоол танилцуулсны дараа гэр оронд үзлэг хийх, цагдан хорих, хувийн баталгаа авах, таслан сэргийлэх хүний эрхийг хязгаарлаж болох арга хэмжээ рүү шилжих нөхцөл байдал хуулийн хүрээнд үүсэх юм” хэмээн тайлбарласан. Тэрээр “19.9.1-ээр мэдүүлэг авсангүй. Гомдол Эрүүгийн хуулийн тусгай ангийн 13.14 буюу худал мэдээлэл тараасан, үүнтэй холбоотой 204 дугаар гомдол ирсэн гэж мэдүүлэг авах шаардлагатай гэж хэлсэн боловч яллагдагчаар татах тогтоол танилцуулах гэж байгаа мэт сэжигтний мэдүүлэг авч байна… Прокурорын зөвшөөрөл өгсний дараа ялагдагчаар татах тогтоол танилцуулсны дараа утсыг хурааж авах, нэгжлэг хийх, компьютер эд зүйлийг хурааж авдаг байтал урвуу байдлаар хаана байгааг нь олж мэдэж баривчилж, эд хөрөнгийг нь хурааж аваад одоо прокуророос зөвшөөрөл авах гэж байна гэх байдлаар явж болохгүй” гэх мэдээллийг хэвлэлийн хурлын үеэр өгсөн.

03 дугаар сарын 18-ны 14:30 минутад Цагдаагийн Ерөнхий газраас хэвлэлийн хурал хийж уг үйл явдалтай холбоотой мэдээллийг хүргэлээ. Цагдаагийн ерөнхий газрын Хэвлэл мэдээлэл, олон нийттэй харилцах хэлтсийн дарга, цагдаагийн дэд хурандаа Г.Пүрэвдэлгэр “Цагдаагийн байгууллагаас цахим орчинд үйл ажиллагаа явуулдаг Ноорог нэртэй пэйжийн хэвлэн нийтлэх үйл ажиллагаа буюу тухай пэйжид нийтлэгдсэн пост, нийтлэл, контенттой холбоотой ямар нэгэн мөрдөн шалгах, гүйцэтгэх ажиллагаа явуулаагүй гэдгийг албан ёсоор мэдэгдье” хэмээн мэдээлсэн.

Эрүүгийн цагдаагийн газрын Кибер гэмт хэрэгтэй тэмцэх газрын дарга, цагдаагийн хурандаа С.Тайван “Ноорог пэйжийн контент бүтээгч залуучуудтай холбоотой холбогдох шалгалтын ажиллагааг цагдаагийн байгууллагаас явуулж байна. Цагдаагийн байгууллагын зүгээс хэвлэн нийтлэх эрх чөлөө болон хэвлэл мэдээллийн байгууллагатай нь холбож шалгаж буй зүйл байхгүй. Хувь хүний нууцад халдах, хувь хүний нууцыг задруулах, мөн цахим мөрийтэй тоглоом зохион байгуулах гэмт хэргийн тодорхой сэжүүр, шинж тэмдэг байсан учраас цагдаагийн байгууллагаас холбогдох мөрдөн шалгах үйл ажиллагааг прокурорын хяналт дор явуулж байна. Өчигдөр хойшлуулшгүй ажиллагааны хүрээнд холбогдох мөрдөн шалгах ажиллааг прокурорт танилцуулсны үндсэн дээр зохион байгуулсан. Энэ хүрээнд найман иргэнийг дуудан авчирч холбогдох мэдүүлэг тайлбарыг авах гэсэн боловч долоон иргэн нь өмгөөлөгчийг байхад мэдүүлэг өгөхийг хүссэн. Хүсэлтийг хангаж 22:30 минутад авчирч, 04:30 минутад явуулсан. Энэ нь мөрдөн шалгах ажиллагааны хүрээнд хуулиар олгогдсон эрх хэмжээний хүрээнд ажилласан ажиллагаа. Мөрдөн шалгах ажиллагааг Киөер гэмт хэрэгтэй тэмцэх газрын бүрэн камертай өрөөнд хийж, мэдүүлэг тайлбарыг авсан. Хууль зөрчөөд хийх ямар ч боломж бололцоо байхгүй… Цагдаагийн байгууллагаас хэвлэлийн эрх чөлөө, хэвлэн нийтлэх эрх чөлөөнд халдаж энэ үйл ажиллагааг явуулаагүй” гэв.

Цахим орчинд түгж буй мэдээлэлд тодруулга хүсэхэд цагдаагийн хурандаа С.Тайван “Цахим орчинд янз янзын мэдээлэл гарсан, тэрийг бол мэдэхгүй байна, мөрөн шалгах ажиллагааны явцад нөхцөл байдал тодорхой болно” гэлээ. Мөн “Энэ асуудал бол хэвлэлийн эрх чөлөө, хэвлэн нийтлэх эрх чөлөөнд халдаж байгаа гэдгээрээ онцлог байгаа гэж харагдаж байна. Цагдаагийн байгууллагаас хэвлэлийн эрх чөлөө, хэвлэн нийтлэх эрх чөлөөнд халдаж энэ ажиллагааг явуулаагүй гэдгийг та бүхэнд онцолж хэлэх гэсэн юм” гэжээ.

ЦЕГ-ын Хэвлэл мэдээлэл, олон нийттэй харилцах хэлтсийн дарга, цагдаагийн дэд хурандаа Г.Пүрэвдэлгэр “Уг этгээдүүд ямар үндэслэл журмаар шалгасан бэ гэдгийг дэлгэрүүлж яривал, иргэдийн мэдээллийг хууль бусаар цуглуулсан, иргэдийг мөрдөн мөшгөх, мэдээллийг нь цуглуулах, хууль бусаар эрх чөлөөнд нь халдах, хувь хүний мэдээлэлд халдсан үйлдлүүд урьдчилсан байдлаар тогтоогдсон. Шалгалтын ажиллагаагаар дэлгэрэнгүй тогтоогдоно“ гэж мэдээлсэн ба хэвлэлийн хурлын төгсгөл хэсэгт “Одоогоор ийм зүйл ангиар шалгана гэж хэлэх боломжгүй. Мөрдөн шалгах үйл ажиллагааны хүрээнд хураагдсан зүйл, оролцогч, гэрчүүдийн өгсөн мэдүүлэг, тогтоогдож буй нөхцөл байдлуудыг үнэлж, Эрүүгийн хуулийн аль зүйл ангиар шалгах, гэмт хэрэг мөн эсэхийг нарийвчилж тогтооно… Яг ямар зүйл ангиар шалгаж буй нь мөрдөн шалгах үйл ажиллагааны нууцад хамаарах мэдээлэл…” гэх тайлбарыг өгсөн.

Интернэт орчинд “Ноорог.мн хуудас тролл баг ажлуулж байсан нь тогтоогдсон тухай ЦЕГ-аас мэдээлсэн” гэх агуулгатай мэдээлэл түгсэн. Эм Си Эс компанийн тролл баг ажиллуулж байсныг тогтоосон гэх мэдээлэл байхгүй бөгөөд ЦЕГ-аас өгсөн мэдээлэлд энэ талаар огт дурдаагүй, түүнчлэн цахим орчинд түгж буй мэдээллийг мэдэхгүй гэсэн тайлбар өглөө.

Эх сурвалж: Монголын баримт шалгах төв