Фото: Нисэх хүчин ойгоо ёслол төгөлдөр тэмдэглэж байна

Монгол Улсад Нисэх хүчин үүсэж хөгжсөний 100 жилийн ойд зориулсан нээлттэй өдөрлөг нисэх хүчний үүсэл хөгжлийг харуулсан 1000 гаруй зураг, үзмэр бүхий үзэсгэлэнгээр нээгдсэн бол нисэх хүчний сүр жавхааг илтгэсэн ёслолын жагсаалаар үргэлжлэв. Ёслолын жагсаал командлагч Зэвсэгт хүчний Агаарын цэргийн командлагч хурандаа Б.Мөнх-Ирээдүй Батлан хамгаалахын сайд С.Бямбацогтод илтгэл өгсөнөөр нисэх онгоцууд болон 50 орчим нисэхийн үйлчилгээний тусгай зориулалтын машин техник, 1000 орчим алба хаагчид оролцсон сүрт баярын жагсаал ёслол төгөлдөр болж өнгөрлөө.

Буянт-Ухаад цугласан задгай талбайд дэлгэн байрлуулсан нисэх хүчинд ашиглагдаж байсан болон одоо ашиглагдаж байгаа олон төрлийн онгоц, нисдэг тэрэг, нисэх хэрэгсэл тэргүүтэй сонирхолтой үзмэрийг үзэж сонирхов. Тус ойн арга хэмжээнд оролцохоор хүрэлцэн ирсэн ОХУ-ын уран нислэгийн "Стрижи" багийнхан дуунаас хурдан Миг-29 онгоцоороо эр зориг, ур чадвар шаардсан цаг орчмын нислэгийн үзүүлбэрээ толилууллаа. Үлээвэр хөгжимчдийн үзүүлбэр, Нисэх загварын бүтээлүүдийн уран нислэгийн уралдаан, Шүхрийн буулт, Жагсаалын болон Гардан тулааны үзүүлбэр, ЦДБЭЧ-ын авьяаслаг уран бүтээлчид, урлаг соёлын одууд оролцсон тоглолтод иргэд сэтгэл хангалуун байна. Уг арга хэмжээ үдшийн цэнгүүнээр үргэлжилж, ёслолын буудлагаар 21.30 цагт өндөрлөх юм.