Garry Martinez: Монголын ард түмэнд талархаж байна

Филиппиний хөдөлмөрчдийн эрхийг хамгаалдаг "Migrante International" байгууллагын дарга асан Garry Martinez-аас талархлын захидал илгээжээ. Уг захидалд:

"Хүндэт Будрагчаа Сэрдамба,

Танд энэ өдрийн мэнд хүргэе. Эрэн сурвалжлах сэтгүүлчийн хувьд таны ур чадвар, чин сэтгэлтэй хөдөлмөрт гүнээ талархаж байна. Манай элэг нэгт Филиппин иргэн Террил Атиензад үнэндээ юу тохиолдсоныг илрүүлэхийн төлөө тууштай, гүнзгий мөрдөн сурвалжилж, үнэний төлөө зогсож буйд тань баярлалаа.

Энэ урт тэмцэл дөнгөж эхэлж байгааг бид ойлгож байна. Одоогийн байдлаар бидний хийж чадах цорын ганц зүйл бол шударга ёсны хүрд зөв чиглэлд эргэж, урагшлахыг анхааралтай ажиглах явдал юм.

14 жилийн өмнө Riel Atienza ээжийнхээ хэргийн талаар манай Migrante International байгууллагад хандан ирж байсан. Бид кампанит ажил өрнүүлж, Филиппиний Засгийн газраас Монголын эрх баригчидтай холбоо тогтоохыг шаардаж байлаа. Гэвч харамсалтай нь юу ч хийгдээгүй, тэд бидний дуу хоолойг сонсохгүй, харахгүй мэт хандсан.

Иймээс бид олон нийт, сургуулиуд, сүм хийдүүдэд хандан Террил Атиензад юу тохиолдсон талаар үнэнийг түгээхээр ажилласан юм.

Тэр үед Атиенза гэр бүлийнхэн манай Засгийн газрын албан тушаалтнуудын өмнө зоригтойгоор нүүр тулан зогссоныг би онцлон сайшааж байна. Риел бол ээжийнхээ төлөө шударга ёс нэхэж буй гадаадад ажиллагч (OFW) бүхий л охидын төлөөлөл, бэлгэдэл болж чадсан.

Дахин хэлэхэд, чин сэтгэлийн гүнээс танд талархал илэрхийлье. Мөн Атиенза гэр бүлийг бүхий л талаар дэмжиж ирсэн Монголын ард түмэнд миний гүн талархлыг уламжилж өгнө үү.

Маш их баярлалаа.

Хүндэтгэсэн,

Гарри Мартинез" гэжээ.