Тусгай дуут дохио ажлуулсан тээврийн хэрэгсэлд зам тавьж өгөхийг уриалж байна

Энэ оны эхний 2 сарын байдлаар нийт 107,773 дуудлага мэдээлэл дээр ажилласан байна. Үүнээс гэмт хэргийн шинжтэй 5,857, зам тээврийн ослын 25,218 зөрчлийн 6,069 гэр бүлийн хүчирхийллийн шинжтэй 6,681 дуудлага, мэдээлэл тус тус бүртгэгджээ.

Дуудлага бүрт цаг алдалгүй очиж ажиллах үүрэгтэй цагдаагийн нэг тээврийн хэрэгсэл хоногт дунджаар 60-70 дуудлага, мэдээлэлд ажиллаж байна. Цагдаагийн байгууллагын үйл ажиллгаааны журамд зааснаар нэг дуудлага, мэдээлэл 15 минутын дотор очих үүрэгтэй боловч замын түгжрэлээс шалтгаалан тусламж, үйлчилгээг иргэдэд цаг алдалгүй хүрэхэд хүндрэл үүсэж байна.

Цагдаагийн байгууллагаас яаралтай тусламжийн үйл ажиллагааг саадгүй явуулах, иргэдийн аюулгүй байдлыг хангах үүднээс замын хөдөлгөөнд оролцогчдод дараах анхааруулгыг хүргэж байна.

Замын хөдөлгөөний дүрмийн 4.4-т зааснаар тусгай дуут болон гэрлэн дохио ашиглан хөдөлгөөнд оролцож буй тээврийн хэрэгсэл (түргэн тусламж, гал унтраах, цагдаа зэрэг) ойртон ирж яваа тохиолдолд бусад тээврийн хэрэгслийн жолооч нар яаралтайгаар зам тавьж өгч, тэдгээрийн саадгүй, шуурхай зорчих нөхцөлийг бүрдүүлэх үүрэгтэй.

Тусгай дуут дохиотой тээврийн хэрэгсэл нь хүний амь нас, эрүүл мэнд, эд хөрөнгийг авран хамгаалах чухал үүрэг гүйцэтгэдэг тул иргэн бүр хариуцлагатай хандаж, хөдөлгөөний соёлыг эрхэмлэн, зам тавьж өгөхийг уриалж байна.

Тусгай дуут болон гэрлэн дохио сонссон, харсан даруйд сандралгүйгээр хурд сааруулж, аюулгүй байдлыг ханган зам тавьж өгнө.

·        Аль болох баруун гар тийш шахаж, уулзвар болон нарийн хэсэгт саад учруулахгүй байхыг анхаарна.

·        Огцом тоормослох, гэнэтийн хөдөлгөөн хийхээс зайлсхийж, бусад тээврийн хэрэгслийн хөдөлгөөнийг давхар тооцоолох.

·        Тусгай дуут дохиотой тээврийн хэрэгслийн араас дагаж явах, давуу байдал ашиглахыг хориглоно.

·        Уулзвар дээр орж амжаагүй бол түр хүлээж, замыг бүрэн чөлөөлсний дараа хөдөлгөөнөө үргэлжлүүлнэ.

·        Явган зорчигчид болон бусад оролцогчдод анхаарал хандуулж, осол гаргах эрсдэлээс сэргийлэх.

·        Замын хөдөлгөөний дүрмийг чанд мөрдөж, соёлтой, хариуцлагатай оролцохыг эрхэмлэнэ үү.

Та зам тавьж өгснөөр хүний амь насыг аврах үйлсэд үнэтэй хувь нэмэр оруулж буй хэрэг юм.