Канье Уэст “Parler” нийгмийн сүлжээг худалдан авахаар болжээ
Еврейчүүдийг гадуурхсан агуулгатай зүйл бичиж оруулсныхаа дараа твиттер, инстаграм хаягаа хаалгасан Америкийн реппер Канье Уэст өөрийн гэсэн нийгмийн сүлжээний платформтой болохоор шийджээ.
Тэрээр барууны үзэл баримтлалыг дэмждэг “Parler” нийгмийн сүлжээг худалдаж авахаар болсон байна.
Үнийн дүнг нь нууцалж байгаа худалдах гэрээг энэ оны сүүлээр байгуулна гэдгийг Parler-ийн толгой компани болох “Parlement Technologies”-ийн гүйцэтгэх захирал Жорж Фармер мэдэгдлээ.
“Энэ гэрээ нь үг хэлэх эрх чөлөөний талаарх дэлхийн үзлийг өөрчилнө. Канье Уэст үзэл бодлоо чөлөөтэй илэрхийлэх өөрийн гэсэн орон зайтай болсноор нийгмийн сүлжээнээс дахин гадуурхагдаж, хаягаа хаалгах айдасгүй болно” гэж Жорж Фармер хэллээ.
Консервативуудын дунд алдартай Parler аппликейшнийг 2018 онд үүсгэсэн бөгөөд 2020 оны АНУ-ын Ерөнхийлөгчийн сонгуулийн үеэр Трампыг дэмжигчид идэвхтэй ашиглаж олонд таниулжээ.
Сүүлийн үед олны шүүмжлэлд ихээр өртөх болсон реппер Канье Уэст өнгөрсөн долоо хоногт өөрийн твиттертээ “Би өнөө орой жоохон нойрмог байна. Гэхдээ сэрэхдээ Еврей ард түмний эсрэг "Defcon 3" горим руу шилжинэ. Гэхдээ би үнэхээр антисемит байж чадахгүй нь инээдтэй юм. Учир нь хар арьстнууд үнэн хэрэг дээрээ еврейчүүд” гэсэн утгатай зүйл бичсэнийхээ дараа твиттер хаягаа хаалгасан юм. Инстаграм ч гэсэн Канье Уэстийг еврейчүүдийг гадуурхсан зүйл бичсэнийх нь дараа аккаунтийг нь хаасан.
- Шинэ мэдээ
2 Сэтгэгдэл