Гадаадын ажиллах хүчний тухай хуулийн төслийг буцаан татлаа

УИХ дахь МАН-ын бүлэг өнөөдөр /2024.12.23/ ээлжит хуралдаанаараа Засгийн газраас өргөн барихаар төлөвлөж буй зарим хуулийн төслийн танилцуулгыг сонсчээ. Хуралдаанаар хэлэлцсэн онцлох асуудал бол УИХ-ын гишүүн П.Сайнзориг нарын өргөн барьсан хуулийн төсөл байлаа.

Тодруулбал, УИХ-ын гишүүн П.Сайнзориг, Н.Батсүмбэрэл нар өргөн барьсан "Монгол Улсад хөдөлмөр эрхлэх гадаад ажилтны тоо, хувь хэмжээ тогтоохгүй байх, гадаад ажилтны ажлын байрны төлбөрөөс чөлөөлөх тухай" хуулийн төсөл, Ажиллах хүчний шилжилт хөдөлгөөний хуулийн нэмэлт өөрчлөлт, зөрчлийн тухай хуулийн нэмэлт өөрчлөлтийг татлаа.

Энэ талаар хууль санаачлагчид мэдээлэл хийхдээ "Өнөөдөр ирж байгаа санал шүүмжүүдийг авч үзээд энэ хуулийг эргүүлэн татаж байна. Татвар, хувийн хэвшилд үүсч байгаа дарамтыг яаж бууруулах, ажиллах хүчний хомсдолыг хэрхэн шийдвэрлэх, бүтээн байгуулалтыг дэмжсэн хууль эрх зүйн орчныг бүрдүүлэх чиглэлд цаашдаа ч ажиллах болно. Бодлого, зарчим, байр суурь хэвээрээ байгаа. Энэхүү хуулийн төслийг боловсруулахдаа тооцоо судалгааг дутуу хийсэн, олон нийтэд мэдээллийг бүрэн гүйцэд өгөөгүйгээс болж олон нийтэд бухимдал төрүүлсэнд уучлалт хүсч байна. Бид энэ асуудлаараа дахиад судалж та бүхэнд танилцуулж мэдээлэх болно" гэлээ. 

Өнөөдрийн бүлгийн хуралдаанд Монгол Ардын Намын дарга, Монгол Улсын Ерөнхий сайд Л.Оюун-Эрдэнэ “Улс орны нийгэм, эдийн засгийн өнөөгийн байдал, “Шинэ сэргэлтийн бодлого”-ын хэрэгжилт, 2025 онд хэрэгжүүлэх төсөл арга хэмжээний талаар мэдээлэл хийсэн юм.

Мөн Монгол Ардын Намын ерөнхий нарийн бичгийн дарга Я.Содбаатар “2025 онд зохион байгуулагдах МАН-ын XXXI дүгээр их хурлын бэлтгэл ажил, намаас дэвшүүлэх “AGENDA-6” 2.0 хөгжлийн стратеги зорилтын талаар танилцууллаа.

Хууль зүй, дотоод хэргийн сайд О.Алтангэрэл “Жагсаал, цуглаан хийх, журмын тухай хуулийн шинэчилсэн найруулга”, “Хэвлэл мэдээллийн эрх чөлөөний тухай хуулийн шинэчилсэн найруулга”, “Хүний эрх, эрх чөлөөг хангахтай холбоотой зарим хуульд нэмэлт өөрчлөлт оруулах тухай” хуулийн төслүүдийг УИХ-д өргөн барихын өмнөх танилцуулга, мэдээллийг хийж, хэлэлцэж буй асуудалтай холбогдуулан гишүүд асуулт асууж, хариулт авлаа.