“Цөмөөч ханхүү ба хулганы хаан” балетад хүүхдүүд ээжтэйгээ тоглоно

Зөвхөн олон сар жилээр тусгай бэлтгэгдсэн авьяастнууд л балетын дүрд тоглох боломжтой гэсэн ойлголтыг “Цөмөөч ханхүү ба хулганы хаан” балет эвдэж байна. Ирэх бямба, ням гаригт СТӨ-нд 150 хүүхэд, томчуудын бүрэлдэхүүнтэй тоглох тус балетад гурван сар бэлтгэгдсэн хүүхдүүдийн зарим нь  ээжүүдтэй хамт тоглох нь.  

Олон Улсын Урлаг боловсролын хөгжлийн “Гэрэлт ертөнц” академи “Дэлхийн соёл Монгол хүүхдэд” төслийнхөө хүрээнд “Цөмөөч ханхүү ба хулганын хаан” балет наадмыг хоёр дахь жилдээ энэ сард зохион байгуулж байна. ОХУ-ын балетын жүжигчдийн хамт 12 дугаар сарын 28. 29-ний өдөр Соёлын төв өргөөнд тоглох тус балетын тоглолтын үнэ 33 000-55 000 төгрөг.     

Дэлхийн аль ч улс оронд шинэ жилийн баяраар хүүхэд багачууд, томчуудад урлагийн гайхамшгийг мэдрүүлэн шидэт ертөнцөөр аялуулдаг сонгодог тоглолт илүү олон хүүхэд багачууд, томчуудад хүрээсэй гэдэг үүднээс “Гэрэлт ертөнц” академи олон шинэ шийдэлтэй тоглолтыг зохион байгуулж байна.   

Академийн тэргүүн, балетчин Ч.Батгэрэл  “Бид хүүхдүүдэд зөвхөн тоглолт үзээд зогсохгүй тайзан дээр шидэт үлгэрийн дүр бүтээх үүд хаалгыг нээдгээрээ онцлог.  Манай сургалтыг ОХУ-д балетийн мэргэжил эзэмшсэн,  хайр татсан олон дүр бүтээж амилуулсан багш нар эрхлэн явуулдаг. Бидний хувьд илүү олон хүүхдийг тоглолтдоо хамруулж балетын урлагаар хичээллэх боломжийг олгохыг зорьж байна. Тиймээс “Цөмөөч ханхүү ба хулганын хаан” балетдаа цасан ширхэгийн бяцхан охидоос эхлээд Орос, Хятад, Испани үндэстний хүүхэлдэй гээд олон дүрүүдийг нэмж дэглэж хүүхдүүдээ тоглуулж байна.

Эцэг эхчүүд идэвхтэй байж энэ хотын түгжээнд хүүхдүүдээ хичээл сургалт таслуулахгүй зөөж хамруулж байгаад үнэхээр их талархаж байна. Сургалтад хамрагдсан хүүхдүүд балетын урлагт улам бүр догдолж дурладаг. Тиймээс бид хүүхдүүдээ уйгагүй зөөж байгаа ээжүүддээ бэлэг барихаар 19 зууны хатагтайн дүрд бүжиглэх санал тавьсан.  Маш баяртайгаар хүлээж авч ордны бүжгийн сургалтад хамрагдаж хүүхдүүдтэйгээ хамтран тайзнаа бүжиглэж байна. Ер нь бидний тоглолт гэр бүлээрээ цугласан баярт мөчүүд болж өрнөдөг. Монгол хүүхдүүд энэ сонгодог урлагийн бүтээлийг үзээд зогсохгүй суралцаж, жүжигт оролцон тоглосноороо олон талаараа хөгждөг” гэлээ. 

“Гэрэлт ертөнц” академи нь сонгодог урлагаар дамжуулан үндэсний бахархлыг бий болгохын зэрэгцээ өв тэгш үндэсний ухамсарт эх оронч монгол хүнийг төлөвшүүлэхэд хувь нэмэр оруулах зорилготой “Дэлхийн соёл Монгол хүүхдэд” төслийг санаачилжээ.

Самар цөмөгч модон цэргүүд Маша охиныг аврахыг тулд хулганын хаан ба түүний цэргүүдтэй хэрхэн тулалдан тэмцэж байгааг яруу тансгаар өгүүлдэг “Цөмөөч ханхүү ба хулганын хаан” балетийг хүүхэд багачуудтайгаа үзэж урлагийн гайхамшгийг мэдрэн мартагдашгүй дурсамж бүтээхийг урьж байна.  

“Цөмөөч ханхүү ба хулганы хаан” балет Монголын үйлдвэрчний эвлэлийн соёлын төв өргөөнд энэ сарын 28. 29-ны өдөр  13.00, 18.00 цагаас тус тус болно. Тоглолтын тасалбар TICKET.MN сайтаар борлуулж байна.