Угаартаж нас барсан хүмүүсийн тухай илтгэх хуудас гэх мэдээлэл худал

2025 оны 02 дугаар сарын 06-наас цахим орчинд түгээж буй угаартаж нас барсан гэр бүлийн хүмүүсийн тухай мэдээлэл гэх хуудсыг түгээж эхэлсэн. Уг бичвэрт дурдсан агуулгуудад хуурамч мэдээлэл байгаа гэдгийг Хууль зүй, дотоод хэргийн сайд О.Алтангэрэл хэлсэн. Мөн хэвлэл мэдээллийн байгууллагуудын холбогдох эх сурвалжуудаас тодруулсан мэдээлэлд дээрх бичвэртэй нийцэхгүй агуулгууд байгааг мэдээлж байна. Харамсалтай нь тухайн хуурамч мэдээлэлтэй илтгэх хуудас гэгдэх зургийг эсэргүүцэж хуваалцахдаа ч бичвэр дэх мэдээллийг илүү олон хэрэглэгч рүү түгээсээр байна. Энэ нь тухайн хуурамч мэдээллийг бүтээж, түгээж буй этгээдийн зорилгыг хангаж, илүү олон хүнд талийгаачдын талаар хуурамч мэдээлэл хүргэсээр байгаа тул тэмдэглэгээ зүүх шаардлагатай байна.

Мөн 02 дугаар сарын 07-ны Баримт нэн тэргүүнд сүлжээний гишүүн gogo.mn сайтад ХЗДХЯ-ны сайд О.Алтангэрэл мэдээлэл хийснийг нийтэлсэн байна. Уг мэдээлэлд “Энэ нь хүний хувийн мэдээлэл хамгаалах хуулийг ноцтой зөрсөн, Эрүүгийн хуулийн 11-р зүйлээр хариуцлага хүлээлгэх гэмт хэрэг юм. Хэрэв хувь хүний нууцыг задруулсан бол 5 хүртэлх жилээр хорих ялтай, хүндрүүлэх нөхцөлтэй байдаг. Энэ мэдээллийг албан шугамаар олж аваад цацсан бол гэмт хэрэг. Энэ бол зөвхөн нэг алба хаагчийн алдаа биш, цаашлаад ЦЕГ-ын удирдлагуудын түвшинд хариуцлага тооцно. Өчигдөр шөнө яаралтай ажлын хэсэг байгуулагдсан. Энэ мэдээлэлд дурдсан зарим нь үнэнтэй нийцэхгүй ташаа мэдээлэл байсан. Өөрөөр хэлбэл нэг хэсэг нь цагдаад байхгүй мэдээлэл байсан ч, мөн цагдаад хадгалагдаж байсан ч мэдээлэл байна. Тэгэхээр зориудаар ташаа мэдээлэл түгээжээ. Хэн үүнийг хийв, цагдаагийн байгууллага илрүүлэхээр ажиллаж байна” гэж хэлсэн байна.

Баримт нэн тэргүүнд үндэсний сүлжээний гишүүн NTV телевизээс БГД-ийн 22 дугаар хорооны засаг дарга Ц.Баасандамбаас тодруулга авсан байна. Тус тодруулгад “…Гэмт хэрэг зөрчилд оролцсон эсэхийг бид мэдэхгүй, цагдаад л байдаг мэдээлэл. Тэр айлаар орж тусламж үйлчилгээ үзүүлсэн зургийг нь явуул гэдэг Экологийн цагдаагийн газрын шаардлагын дагуу бид цаг тухайд нь явуулсан…” гэсэн байна. Мөн “…ах нь хамтдаа амьдарч байсан гэдэг мэдээлэл бид өгсөн. Харин тэр итгэх хуудсанд “хамтран амьдрагч” гэж ташаа мэдээлсэн байнэ лээ” гэжээ.

Мөн NTV сувгийн 14:00 цагийн мэдээллийн хөтөлбөрт тус хорооны илтгэх хуудас бичсэн ажилтнаас тодруулга авсан байна.

Тэрээр миний бичсэн илтгэх хуудсанд ямар ч зураг байхгүй, тэр яваад байгаа мэдээлэл манайхаас гараагүй гэдгээ мэдэгдсэн байна.

Нэгэн гэр бүлийн зургаан хүн угаартаж нас барсан харамсалтай хэргийг ашиглан, ташаа мэдээллээр төөрөгдүүлэх, дэгсдүүлэх, хэт нэг талыг баримталсан дутуу мэдээллээр чиглүүлэхийг санаархах зэрэг манипуляцын шинжтэй үйлдлүүд нийгмийн сүлжээгээр түгээсээр байгаа нь харамсалтай.

Эх сурвалж: Монголын баримт шалгах төв