"Ярьдаг футболк" хүний эрхийн өдөрлөг өнөөдөр болно
Хүний эрхийн боловсрол, соёлыг түгээх, үзэл бодлоо илэрхийлэх эрхийг дэмжих зорилгоор “ЯРЬДАГ ФУТБОЛК” арга хэмжээг Монголын Эмнести Интернэшнл жил бүрийн 5 дугаар сард буюу Эмнести Интернэшнлийн үүсэн байгуулагдсан өдрийг тохиолдуулан зохион байгуулсаар ирсэн.
10 дахь жилдээ зохион байгуулагдах гэж буй энэ арга хэмжээ 2025 оны 5-р сарын 31-ний өдрийн 12:00-16:00 цагт Рио парк (Улаанбаатар цэцэрлэгт хүрээлэн)-д болно.
Үзэл бодлоо чөлөөтэй илэрхийлэх, тайван хуран цуглах, эвлэлдэн нэгдэх эрхээ хэрэгжүүлснээр бид эрх тэгш байдал, шударга ёс, эрүүл аюулгүй орчинд амьдрах, эрүүдэн шүүхээс ангид байх зэрэг бүхий л эрхээ шаардаж чадна. Эрхээ мэддэг хүн эрхээ шаардаж, хамгаалж, бас эдэлж чадна.
Энэ ч утгаараа Монголын Эмнести Интернэшнл нь иргэний нийгмийн байгууллагууд, хүний эрх хамгаалагч, идэвхтэн, хүүхэд, залуучууд, иргэдийг өөрийн үзэл бодол, олон нийт, төр засагтаа хүргэхийг хүсч буй үгээ футболк дээрээ хүссэн загвараараа урлаж, өмсөн, цаашид зуны турш энэ футболкоороо гангаран, өөрийн үгээ, үзэл бодлоо, үнэт зүйлсээ хүмүүст хүргэх боломжийг олгохыг зорьж байгаа юм.
Одоогоор “Ярьдаг футболк-2025” өдөрлөгт иргэний нийгмийн байгууллагууд, хүний эрхэд ээлтэй ЕБС, их дээд сургуулийн хүний эрхийн идэвхтэн, дэмжигч, иргэд оролцохоор бүртгүүлээд байна. “Ярьдаг Футболк” хүний эрхийн үзэл санааны энэхүү өдөрлөгт Монголын Эмнести Интернэшнл “Дарангуйллыг бүү хүлцэн тэвч”, “Насаа тунхагла”, “Ирээдүй хойчийн эрх- байгаль орчин” уриатайгаар оролцож, үг хэлэх, үзэл бодлоо илэрхийлэх, тайван замаар хуран цуглах, ахмадын эрх, уур амьсгалын өөрчлөлт хүний эрхийн тулгамдаж буй асуудлаар оролцож байна.
Хүн бүр өөрийн өмсөх дуртай футболк дээрээ үзэл санаагаа урлаж, нэгдэхийн зэрэгцээ хүний эрхийн мессэж, зураг, илэрхийлэл бүхий өөрийн урласан бүтээлээрээ “ФУТБОЛКНЫ УРАЛДААН”-д хувиараа, сургуулиараа, байгууллага хамт олноороо оролцох боломжтой.
Энэ жилийн өдөрлөг Улаанбаатар хотоос гадна Архангай, Баян-Өлгий, Дархан-уул, Завхан, Орхон, Ховд аймагт зохион байгуулагдаж байгаагаараа онцлог.
Өдөрлөгийн үеэр “Ярьдаг футболк” парад алхалтанд нэгдэхээс гадна нээлттэй микрофоноор үгээ хэлж, гитартай дуутай, парадтай, загварын үзүүлбэртэй нэг өдрийг хамтдаа тэмдэглэн өнгөрүүлэх юм.
Урлаг бол нийгэмд эерэг өөрчлөлт, эв нэгдэл, эрх чөлөөг авчрах хүчтэй зэвсэг байсаар ирсэн. Энэ өдөр нь эрхээ мэддэг, эрхээ шаарддаг, эрхээ хамгаалахын төлөө үгээ хэлж, үзэл бодлоо илэрхийлдэг хүмүүсийн баярын өдөр. Хүний эрхийн мэдрэмжтэй, нийгэмд дуу хоолойгоо өргөхийг хүсдэг хүн бүрийг “Ярьдаг футболк” өдөрлөгт урьж байна.
- Шинэ мэдээ
1 Сэтгэгдэл