Найзыгаа хэрцгийгээр зодсон Г.Чинзоригийг холимог тулаанч биш гэж мэдэгдэв

Чингэлтэй дүүрэг дэх Дэнжийн мянга орчим байрлах авто засварын газарт холимог тулаанч Г.Чинзориг нь 29 настай найз М.Тэнгисийг төмрөөр толгойн тус газарт нь олон удаа цохиж, хүнд бэртэл учруулсан ноцтой хэрэг энэ сарын 26-нд болж, бичлэг нь цахим орчинд цацагдаж олон нийтийг цочирдуулав.

Хохирогч М.Тэнгис эмэгтэй хүн өмөөрч маргаснаас зодуулсэн гэх бөгөөд тэрээр одоогоор биеийн байдал хүнд, сэхээнд байгаа гэнэ.

Тэгвэл хэрэг үйлдсэн Г.Чинзоригтой холбоотойгоор "Монголын тулааны шилдэг тамирчдын холбоо" НҮТББ-аас Мэдэгдэл гаргажээ. Уг мэдэгдэлд түүнийг холимог тулаанч биш гэдгийг онцолсон байна. Тодруулбал: "Сошиал орчин нэгэн залуугийн хүн бус танхайрсан үйлдлийг холимог тулааны тамирчин гэдэг тайлбартайгаар явж байгаад гүн харамсахын зэрэгцээ энэхүү мэдэгдлийг гаргаж байна. 

"Монголын тулааны шилдэг тамирчдын холбоо" НҮТББ, MGL-1 Fighting Championship холбоо нь 2009 оноос хойш Монгол улсаас холимог тулааны шилдэг тамирчдыг гарган ирэх, хүүхэд залуучуудад тулааны спортын ач холбогдлыг зөвөөр таниулан сурталчлах чиглэлээр ажиллаж ирсэн бөгөөд манай холбооноос төрөн гарсан аваргууд маань Монгол орноо төлөөлөн дэлхийн холимог тулааны шилдэг холбоод болох UFC, ONE CHAMPIONSHIP, JCK, GLADIATOR зэрэгт Төрийн далбаагаа өргөн тулалдаж байна.  

Уг бичлэгт холбогдоод буй Чинзориг гэдэг залуу нь 2017 онд манай холбооны зохион байгуулсан реалити шоунд оролцож, нэг тулаанд оролцох байсан боловч гэмтэл бэртлийн шалтгаанаар цуцлагдаж байсан. Түүний дараагаар сошиал орчинд ямар ч тамирчинд байж болохгүй үйлдэл гаргасан тул цаашид холбооны зүгээс зохион байгуулж буй ямар ч төрлийн арга хэмжээнд оролцуулахгүй гэдэг шийдвэрийг удирдах зөвлөл 2023 онд гаргаж байсан билээ. 

Холимог тулаанаар нэг ч тулаанд оролцож байгаагүй танхай этгээдийг холимог тулааны спортоор хичээллэж буй мянга мянган залуучуудын төлөөлөл мэтээр мэдээлэл түгээж байгаад гүн харамсаж байна.  

Цаашид ч "Монголын тулааны шилдэг тамирчдын холбоо" НҮТББ нь тамирчдын ёс зүйг үргэлж Нэгдүгээр тавих бөгөөд нийт тамирчин, залуучуудад ёс зүйтэй байх хатуу шаардлага тавьж ажиллана гэдгийг үүгээр хатуу мэдэгдэж байна" гэжээ.