МАН-ын ХЕХ шийдвэрээ эргэж харахгүй бол дараагийн шатны арга хэмжээ авахаа мэдэгдлээ
УИХ-ын гишүүн Б.Энхбаярыг МАН-аас хөөсөн асуудлаар УИХ-ын зарим гишүүд мэдээлэл хийлээ. Тус намын Хяналтын Ерөнхий Хороо өчигдөр /2025.10.02/ 13 гишүүнтэйгээр хуралдаж, 1 гишүүн татгалзаж, 1 гишүүн цагаан хуудас өгч, 11 гишүүний дэмжсэн саналаар УИХ-ын гишүүн Б.Энхбаярыг намаас хөөх шийдвэр гаргасан байна. Үүнийг нийт гишүүдийн олонхийн саналын шийдвэр гэж үзэх үндэслэлгүй гэж үзэж буйгаа өнөөдөр УИХ-д анх удаа сонгогдсон МАН-ын зарим гишүүд илэрхийлж мэдээлэл хийв.Мэдээллийн үеэр “Хоёр хүний асуудал байхад гэм буруугүйн зарчим нь зөвхөн нэг хүн дээр үйлчлээд нөгөө хүн дээр нь үйлчлэхгүйгээр шийдвэр гарсанд харамсаж байна. Энэ шийдвэрийг МАН-ын олон мянган гишүүдийн санал гэж бодохгүй байна. Тиймээс энэ саналыг МАН-ын ХЕХ эргэн хараач ээ. Тэгэхгүй бол энэ нь МАН авлигатай тэмцэх ажлаасаа ухарч байгаа гэсэн төсөөллийг бий болгож, нийт гишүүдийн итгэл үнэмшлийг илэрхийлж чадахгүй байна гэж үзэж байна. Намын дүрэм дээр авлигатай холбоотой асуудалд орвол намаас түдгэлзэх заалт бий. Тэгэхээр асуудлыг шүүхээр шийдэгдэж тодорхой болсны дараа ярих ёстой. Намын дүрэмд намаас хасах тодорхой хэдэн заалт бий. Гэхдээ тэдгээрийн алинд ч хамаарахгүй ийм асуудал дээр уг шийдвэр гаргасныг эргэн харах хэрэгтэй. Бидний энэ саналыг дэмжиж нэмэгдэх гишүүд бас байгаа. Хэрэв шударга бус шийдвэрээ эргэж харахгүй бол бид дараагийн шатны арга хэмжээ авна гэдгээ мэдэгдэж байгаа юм. МАН-ын Хяналтын хороо хуралдаж, мэдээлэл ярилцлага өгсөн гишүүнийг хөөсөнтэй холбоотой нам доторх хагаралын үүд хаалгыг нэлээд хүчтэй нээж байна гэж үзэж байна. МАН-ын 30 Их хурлын үндсэн шийдвэр нь шударга ёсыг тогтоох, авлига, албан тушаалын асуудалтай тэмцэх шийдвэрүүд гарч байсан. Энэ үндсэн бодлогодоо нийцэж ажиллах шаардлагатай байна” хэмээн гишүүд үг, үзэл бодлоо илэрхийллээ.
- Шинэ мэдээ