Монголын кино урлагийн "домог" уран бүтээлчид чуулав

Монголын кино урлагийн түүхэнд “Мөнх тэнгэрийн хүчин дор”, “Мандухай цэцэн хатан” хоёр шиг кино дахин хийгдэхгүй гэх яриа бий. Энэ ч үнэн. Тэртээ 1988 болон 1992 онд бүтээсэн энэ түүхэн уран бүтээлийг кино урлагийн түүхэнд Бэгзийн Балжинням найруулагч "тамгалж" үлдээсэн. Өдгөө Төрийн шагналт кино найруулагч Б.Балжинням агсны 80 жилийн ой, “Мөнх тэнгэрийн хүчин дор” киноны 30 жилийн ой тохиож буй. Мандухай цэцэн хатны дүрээр ард түмэндээ хайрлагдсан Төрийн шагналт, Ардын жүжигчин Н.Сувд, Алтжин хатны дүрээ дэлгэцэнд мөнхөлсөн Н.Отгонтогос, Шихихутаг сайд буюу Гавьяат жүжигчин У.Батбаатар тэргүүтэй монгол киноны "домог" болсон уран бүтээлчид Б.Балжинням агсны 80 жилийн ой, “Мөнх тэнгэрийн хүчин дор” киноны 30 жилийн ойн арга хэмжээг чимлээ. "Монгол арт" галерейд өчигдөр /2022.10. 21/ эрдэм шинжилгээний хурлын илтгэлүүд, номын нээлтүүд, “Гэрэлтье гэвэл шатах” найруулагчийн амьдрал уран бүтээлийн фото зургийн үзэсгэлэн, Төрийн шагналт зураач Б. Пүрэвсүхийн “Кинонд амилсан уран зураг” үзэсгэлэн гээд арвин материал, хөтөлбөрийг үзэгч олноо дэлгэн сонирхууллаа. Уран бүтээлийн үзэсгэлэнд дэлгэсэн Б.Пүрэвсүх зураачийн түүхэн кино хийхэд судалсан гайхалтай нарийн судалгаа шинжилгээний ажлууд, дүрийн судалгаа, тухайн цаг үед ямар нягт нямбай ажиллаж байсныг харуулсан судалбар зургууд цугласан олны анхаарлыг татна. Мөн кино зураг авалтын үеэр хийж байсан дүр хувиргалт, дүрийн сонголт, жүжигчдийн зургийг хадгалсан кино монтажчин, найруулагч М.Уртнасангийн хувийн цуглуулга тэр чигээрээ түүх өгүүлнэ.