МҮИС-ийн Байгаль орчин, уур амьсгалын өөрчлөлтийн сайдад холбогдох хэргийг хяналтын шатны шүүх хуралдаанаар хэлэлцсэнгүй

“Монголын үндэсний их сургууль” НҮТББ нь Зайсангийн аманд 25.5 га газрыг аялал жуулчлал болон эко сургуулийн зориулалтаар ашигладаг. Үүнээс 1 дүгээр талбайн 21140 мкв талбайгаас 1058 мкв, 2-р талбайн 136,820 мкв талбайгаас 23,643 мкв нь “ойн сангийн газартай давхцалтай” гэх үндэслэлээр, газар ашиглах эрхийг хэсэгчлэн цуцалсан байна.

Нийслэл дэх Захиргааны хэргийн анхан шатны шүүхээс “...Давхцалтай хэмээн хэсэгчлэн цуцалсан ойн сангийн талбай нь ой тэлэн ургах зориулалттай хамгаалалтын бүс биш, торлог бүхий хэсэг ч биш, шигүү шинэсэн ой болох нь маргаан бүхий газарт хийсэн шүүхийн үзлэгийн тэмдэглэл, фото зургаас тодорхой харагдаж байна...” гэж үзээд нэхэмжлэлийг бүхэлд нь хэрэгсэхгүй болгосон.

Захиргааны хэргийн давж заалдах шатны шүүхээс “...Байгалийн бүс, бүслүүрийн онцлог, хэвийн шинжийг төлөөлж чадах унаган төрхөө хадгалсан байгалийн өвөрмөц, үзэсгэлэнт тогтоц бүхий газар аялал, жуулчлалыг хөгжүүлэх зорилго нь Аялал жуулчлалын тухай хуулийн зорилтоос тодорхой харагдах бөгөөд энэхүү зорилго нь тухайн газрыг ашиглахгүйгээр хэрэгжих боломжгүй. Тиймээс Тусгай хамгаалалтай газар нутгийн тухай хуулийн 11, 12 дугаар зүйлд тусгай хамгаалалттай газар нутагт аялал, жуулчлалын зориулалтаар газар ашиглуулах, ийнхүү ашиглуулахдаа ямар барилга, байгууламж барьж болох талаар Аялал жуулчлалын тухай хуулийн харилцан уялдаатайгаар зохицуулсан...” гэж үзэн нэхэмжлэлийг бүхэлд нь хангаж шийдвэрлэсэн.

Улсын дээд шүүхээс уг маргааныг Захиргааны хэргийн танхимын нийт шүүгчийн хуралдаанаар хэлэлцэж, "шүүхийн хууль хэрэглээний зөрүүг арилгах" гэсэн үндэслэлээр хяналтын журмаар хэлэлцүүлэхээр шийдсэн. Гэвч Байгаль орчин, уур амьсгалын өөрчлөлтийн сайд нь хяналтын журмаар гаргасан гомдлоосоо татгалзсан байна. Хуульд зааснаар хяналтын журмаар гомдол гаргасан этгээд хяналтын шатны шүүх хуралдаанаас өмнө гомдлоосоо татгалзвал түүнийг гомдол гаргаагүйд тооцож, хэргийг хянах боломжгүй болдог.

Ингэснээр Захиргааны хэргийн давж заалдах шатны шүүхийн магадлал хэвээр үлдэж байна.