ЭМЯ: Амьсгалын замын цочмог хүнд халдварын 72 хувийг 5 хүртэлх насны хүүхдүүд эзэлж байна
Эрүүл мэндийн яамнаас өнөөдөр /2024.12.11/ томуу, томуу төст өвчний нөхцөл байдлын талаар ээлжит мэдээллээ хийлээ. Мэдээллийг ЭМЯ-ны Нийгмийн эрүүл мэндийн газрын дарга Л.Баттөр өглөө.Өнгөрсөн долоо хоногийн мэдээгээр амбулаторид суурилсан тандалтын нэгжүүдэд нийт 277.320 хүн хандаж тусламж үйлчилгээ авснаас 21.367 буюу 7.7 хувь нь томуу, томуу төст өвчин оношлогджээ. Тэгвэл эмнэлэгт суурилсан тандалтын нэгжүүдийн мэдээллээр 9643 хүн хэвтэн эмчлүүлж байгаагаас 3087 нь буюу 32 хувь нь томуу, томуу төст өвчний хүндрэл буюу амьсгалын замын цочмог хүнд халдвар гэсэн оноштойгоор хэвтэн эмчлүүлж байгаа юм байна. Энэ нь өнгөрсөн жилийн мөн үетэй харьцуулахад 10 хувиар илүү байна. Мөн нийт өвчлөгсдийн 47.1 хувь нь, амьсгалын замын цочмог хүнд халдварын 72 хувийг 5 хүртэлх насны хүүхдүүд эзэлж байна. Таван хүн тутмын нэг нь хүүхдүүд байна гэсэн үг. Үүнийг өнгөрсөн долоо хоногийн мэдээтэй харьцуулахад 8.5 хувиар нэмэгджээ.
Томуугийн эсрэг вакцинжуулалтад Улаанбаатар хотын зорилтот бүлгийн 90.4 хувь нь хамрагдсан байна.
2024 оны арваннэгдүгээр сарын 29-нөөс арванхоёрдугаар сарын 5-ны хугацаанд ХӨСҮТ-ийн Вирус судлалын лабораторид хийсэн 223 сорьцонд шинжилгээ хийхэд 48 буюу 21.5 хувь нь амьсгалын замын синцитиаль вирус, 12 буюу 5.3 хувь нь томуугийн А хүрээний вирус, цар тахлын вирус 11 буюу 4.9 хувь нь SARS-Cov-2 илэрчээ.
ХӨСҮТ-өөс амьсгалын замын цочмог хүнд халдвартай бага насны хүүхдүүдийн 109 сорьцонд шинжилгээ хийхэд 15 төрлийн томуу, томуу төст өвчний үүсгэгчийг илрүүлэхийг зорьсон. Нийт 67 сорьц буюу 64.4 хувьд ямар нэгэн вирус илэрсэн байна. Тухайн вирус дотор 45 хувь нь амьсгалын замын синцитиаль вирус байжээ.
Агаарын бохирдол нийгэм, эдийн засагт нөлөөлөхөөс гадна сэтгэцийн эрүүл мэндэд сөргөөр нөлөөлж байна гэдгийг мөн мэдээллийн үеэр хэлж байлаа.
Холбоотой мэдээ
- Шинэ мэдээ
4 Сэтгэгдэл