ХЭҮК: СӨБ болон бага боловсролын сурах бичгүүдэд дүн шинжилгээ хийнэ

Боловсролын ерөнхий хуульд бүх түвшний боловсролын сургалтын хөтөлбөрт хүний эрхийн боловсрол, жендэрийн эрх тэгш байдлын талаарх агуулга тусгах, мөн Монгол Улсын Хүний эрхийн Үндэсний Комиссын тухай хуулийн 7 дугаар зүйлийн 7.1.5 дахь заалтад “хүний эрхийн боловсролыг дэмжих, түгээх” гэж хуульчилсан байдаг.

Энэ хүрээнд ХЭҮК-ын дарга Д.Сүнжид, Хүний эрхийн боловсролын хэлтсийн дарга Х.Цэцгээ, Боловсролын судалгааны үндэсний хүрээлэнгийн захирал М.Итгэл, Секторын эрхлэгч Х.Энхжаргал нар өнөөдөр /2025.02.25/ сургуулийн өмнөх болон бага боловсролын сургалтын хөтөлбөр, сурах бичгийг шинэчлэн боловсруулах ажлын явцын талаар мэдээлэл хуваалцаж, санал солилцлоо.

Монгол Улсын Хүний эрхийн Үндэсний Комисс нь “Бүх нийт боловсролын төлөө” иргэний нийгмийн үндэсний эвсэлтэй хамтран ерөнхий боловсролын сургуулийн 6-8 дугаар ангийн “Иргэний боловсрол”, 9-12 дугаар ангийн “Иргэний ёс зүйн боловсрол” сурах бичигт хүний эрх, жендэрийн үүднээс 2023 онд дүн шинжилгээ хийж, үр дүнг төрийн болон төрийн бус байгууллагын холбогдох албан тушаалтан, эрдэмтэн, судлаачдад танилцуулсан.

Улмаар 2023 оны 10 дугаар сарын 31-ний өдөр “Хүний эрхийн боловсролын арга зүй” сэдэвт симпозиум зохион байгуулж, хүний эрхийн боловсролыг олгож, түгээж буй тогтолцоо, механизмыг сайжруулах, хүртээмжтэй болгох, үндэсний хэмжээнд хүний эрхийн боловсрол олгох, хүний эрхийн түгээмэл соёлыг төлөвшүүлэх, сургуулийн өмнөх боловсрол, ерөнхий боловсролын сургуулийн хөтөлбөрт хүний эрх, жендэрийн эрх тэгш байдлын агуулгыг тусгах чиглэлийн холбогдох саналыг үндэслэсэн Комиссын зөвлөмжийг Боловсролын яаманд хүргүүлсэн юм.

Боловсролын яамнаас сургуулийн өмнөх болон ерөнхий боловсролын сургалтын хөтөлбөрийн үзэл баримтлалыг Засгийн газрын 2024 оны 04 дүгээр сарын 24-ний өдрийн тогтоолыг удирдлага болгон баталсан бөгөөд энэ хүрээнд сургуулийн өмнөх болон бага боловсролын сургалтын хөтөлбөрийг шинэчлэн боловсруулах, сурах бичгийн тохирц, нийцлийг түшиц цэцэрлэг, сургуульд шалган туршиж, 2025-2026 оны хичээлийн жилээс үндэсний хэмжээнд хэрэгжүүлэхээр ажиллаж байна.

Энэ дагуу сургуулийн өмнөх боловсролын байгууллага болон бага боловсролын нийт 9 сурах бичгийн гарын авлага, судлагдахууны хөтөлбөр, дасгал ажлын дэвтэр, багшийн ном зэргийг боловсруулсан бөгөөд нийслэл Улаанбаатар хот, аймаг, сумдын нийт 27 сургууль, 1 цэцэрлэгийг сонгож, туршилтад нэвтрүүлэн санал авч сайжруулж байгаа талаарх мэдээллийг Боловсролын судалгааны үндэсний хүрээлэнгийн захирал М.Итгэл танилцууллаа.

ХЭҮК-ын дарга Д.Сүнжид сургуулийн өмнөх болон ерөнхий боловсролын сургалтын хөтөлбөрийн үзэл баримтлал, агуулга нь хүүхдийн нас, хүйс, онцлогт тохирсон байх ёстойг онцолж, хүний эрх, жендэрийн эрх тэгш байдлын талаарх агуулгыг зайлшгүй тусгах шаардлагатайг тодотголоо.

Уулзалтын төгсгөлд ХЭҮК нь сургуулийн өмнөх боловсролын байгууллага болон бага боловсролын дээрх сурах бичигт хүний эрх, жендэрийн эрх тэгш байдлын агуулга хэрхэн тусгагдсан, интеграцчилсан эсэхэд дүн шинжилгээ хийж, холбогдох санал, зөвлөмжийн хамт хариу хүргүүлэхээр тохирлоо.