Сэлбэ орон сууцжуулах төслийн ажил эхэллээ

Нийслэлд  хэрэгжүүлж буй томоохон төслийн нэг болох Сэлбэ дэд төв орон сууцжуулах төслийн барилга угсралтын ажил өнөөдөр эхэллээ. Ингэснээр Сэлбэ дэд төв нь анхны жишиг “20 минутын хот” болох шав тавигдаж байгаа юм.

Нийслэлийн Чингэлтэй дүүргийн 14, 18 дугаар хороо болон Сүхбаатар дүүргийн 14 хорооны нутаг дэвсгэрийг хамарсан 158 га талбайд Сэлбэ дэд төвийн төслийг хэрэгжүүлж байна. Сэлбэ дэд төвийг түшиглэн гэр хорооллыг орон сууцжуулах бөгөөд нийт 158 га талбайд 10 мянган айлын орон сууцыг барихаар төлөвлөсөн байна. Өнөөдрийн байдлаар 1700 айлын газрыг чөлөөлж, нөхөн олговрыг шийдвэрлэжээ. Газар чөлөөлөх ажлыг хийхдээ иргэдээс санал асуулга авсан бөгөөд нийт иргэдийн 96.5 хувь нь дэмжиж, Сэлбэ дэд төв төслийн бүтээн байгуулалтад гар бие оролцсон байна. Сэлбэ дэд төвд 20 минутын хот төлөвлөлтийг анхлан бодитоор хэрэгжүүлэхээр төлөвлөсөн байна. Нийт 10 мянган айлын цогцолбор хороолол дунд 2880 хүүхдийн хүчин чадалтай 960 хүүхдийн 3 сургууль, нийт ,200 хүүхдийн хүчин чадалтай 240 хүүхдийн 5 цэцэрлэг барихаар тусгаад байна. Мөн ногоон байгууламжийн нийт талбай 57.7 га байхаар зураглажээ. Төсөл хэрэгжсэнээр хүн амын хэт төвлөрлийг сааруулж, иргэдийн төлбөрийн чадварт нийцсэн орон сууцны хангамжийг нэмэгдүүлэн, эрүүл аюулгүй орчинд ажиллаж, амьдрах нөхцөлийг бүрдүүлэх аж.

Төсөл хэрэгжсэнээр 10.000 айл орон сууц баригдан, энэ хэрээр буюу 10.000 яндан буурна гэж үзэж байгаа юм. Бүтээн байгуулалтын хүрээнд Азийн хөгжлийн банкны хөнгөлөлттэй зээлээр авто зам, дулаан, цахилгаан, холбоо, ус хангамж, ариутгах татуургын шугам сүлжээ, үерийн хамгаалалтын далан, тохижилт ногоон байгууламжийн ажлууд хийгдээд байгаа юм. Сэлбэ дэд төвийн орон сууцны хорооллуудын цэвэр усны шугамыг анх удаа зэс хоолойгоор угсрах, дээвэрт нарны эрчим хүчний хавтан байрлуулахаар төлөвлөжээ. Товчхондоо сэргээгдэх эрчим хүчээр орцны гэрэл, лифт, гарааш зэрэг нийтийн эзэмшлийн талбайн цахилгааны хэрэглээг шийдэхээр төлөвлөсөн байна. Мөн Сэлбэ гол дээр хөв цөөрөм байгуулж үерийн усны тохируулга хийж хөв цөөрөмтэйгөө уялдуулж усны хаялга, борооны ус зайлуулах шугам, шуудууг нь угсрах байна.    

Энэхүү барилга угсралтын шав тавих нээлтийн үеэр Нийслэлийн Засаг дарга бөгөөд Улаанбаатар хотын Захирагч Х.Нямбаатар “УИХ-аар Нийслэлийн Улаанбаатар хотын гэр хорооллыг орон сууцжуулах, авто замын түгжрэлийг бууруулах тухай анхдагч хуулийг батлуулсан. Мөн Өрийн удирдлагын тухай хуульд өөрчлөлт оруулж, хөрөнгө мөнгө босгох эрх зүйн орчноо бэхжүүлсэн. Улмаар газар чөлөөлөх ажлыг эхлүүлж, олон улсын зах зээлээс бонд босгож, санхүүгийн эх үүсвэрийг шийдсэн. Сэлбийн бүтээн байгуулалт III, IV хороолол дээр “Өнөр” хорооллыг нэмсэн дайны том бүтээн байгуулалт болно. Өөрөөр хэлбэл нийтдээ 13 мянган айлын үйлчилгээтэй орон сууцны цогц төсөл болох юм. Бид энэ ажлыг 24 сарын хугацаанд барьж, гэр хорооллын агаар, хөрсний бохирдлоос ангижруулах зорилт тавьсан” хэмээн онцлон хэллээ.