Баянхонгор аймагт үхэр, сарлаг хулгайлсан гурван этгээдийг саатуулжээ

Малын хулгайн гэмт хэргээс урьдчилан сэргийлэхийг сэрэмжлүүлж байна.

Тодруулбал, өчигдөр 15:00 цагийн үед Баянхонгор аймгийн Галуут сумын Хонгилын бууц гэх газраас “Хоёр тооны сарлаг үхэр хулгайд алдагдсан”, 21:00 цагийн үед Богд сумын Цэлгэр гэх газраас “Нэг үхэр хулгайд алдагдсан” гэх дуудлага цагдаагийн байгууллагад бүртгэгджээ.

Дуудлагаар Баянхонгор аймаг дахь цагдаагийн газрын алба хаагчид шалгалтын ажиллагааг шуурхай зохион байгуулахад дээрх хэргүүдийг “Д” болон “Б”, “Ё” нар үйлдсэнийг шуурхай илрүүлж, малын түүхий эдийг худалдан борлуулахаар зөөвөрлөж байхад саатуулсан байна.

Одоогоор мөрдөн шалгах ажиллагаа үргэлжилж байгаа бөгөөд иргэд мал сүргээ байнгын хариулга, манаатай байлгахыг анхаарууллаа.