Нийслэлд 2.8 магнитудын хүчтэй газар хөдлөлт бүртгэгджээ

Нийслэлийн хойд бүс орчимд газар хөдлөлтийг мэдэрсэн гэх олон иргэд өчигдөр цахим орчинд байршлуудынхаа мэдээллийг хуваалцсан. Энэ талаар албаныхнаас тодрууллаа.

Одон орон геофизикийн хүрээлэнгээс мэдээлснээр, Нийслэлийн Сонгинохайрхан дүүргийн Баянхошуу ууланд (48.00N 106.82E) өчигдөр буюу долдугаар сарын 22-ны 23:35:27 цагт 2.8 магнитудын хүчтэй газар хөдлөлт болсон байна.

Тус газар хөдлөлт нь онолын тооцооллоор голомтондоо III-IV балл байсан бөгөөд Баруун салаа, Зүүн салаа, Шарга морьт, Яргайт, Жигжид, Бэлх, Өвөрсогоот, Арсогоот, Сэлх зэрэг зуслан болон Хайлааст, Дэнжийн мянга, Дарь Эхийн ард иргэдэд II-III баллын чичирхийлэл мэдрэгджээ.

Одон орон геофизикийн хүрээлэнгийн одон орны оргилд ажиллаж байгаа хөрсний оргил хурдатгал хэмжигч станцад (хадан хөрсөнд) I-II баллын чичирхийлэл үүсгэсэн байна.