Энэ өвөл олон жилийн дунджаас 5 хувиар хүйтэн байх төлөвтэй, 35 сум зудын маш өндөр эрсдэлтэй

сансраас харагдах Монголын цас

Зураг (сансраас харагдах Монголын цас): Jeff Schmaltz, MODIS Land Rapid Response / NASA, Wikimedia Commons, Public domain

2026–2027 оны өвөл олон жилийн дунджаас таван хувиар илүү хүйтэн байх төлөвтэй гэж холбогдох байгууллагууд мэдээллээ. Зудын эрсдэлийн үнэлгээгээр улсын хэмжээнд 35 сум маш өндөр, 247 сум дунд, 40 сум бага эрсдэлтэй гарчээ.

Арваннэгдүгээр сарын урьдчилсан төлвөөр нутгийн 8 хувьд мал өвөлжилт нэн их хүндрэлтэй, 18 хувьд их хүндрэлтэй, 34 хувьд дунд зэрэг, 24 хувьд бага зэрэг хүндрэлтэй байна. Нутгийн 16 хувьд хүндрэл гарахгүй гэж үзжээ. Хамгийн их эрсдэлтэй нутагт Баян-Өлгий, Увс, Ховд, Завхан, Өмнөговь аймгийн ихэнх нутаг орсон. Мөн Говь-Алтай, Баянхонгор, Хөвсгөл, Архангай, Булган, Өвөрхангай, Дундговь аймгийн зарим нутаг эрсдэлтэй гэж тэмдэглэв.

Зуншлага олон аймгийн цөөнгүй суманд оройтож, гандуу, гантай байсан нь өвөлжилтөд сөргөөр нөлөөлөх магадлалтай. Энэ жагсаалтад Баян-Өлгий, Ховд, Баянхонгор, Дундговь, Өмнөговь, Сүхбаатар, Увс, Говь-Алтай, Хөвсгөл, Архангай, Булган, Өвөрхангай, Төв, Дорноговь, Хэнтий аймаг багтаж байна.

Малчид, иргэдэд өгсөн зөвлөмжид өвөлжүүлэх малын тоо, төрөл, тарга хүч, өвс тэжээлийн нөөцийг урьдчилан тооцохыг онцолжээ. Хээлтэй, төл болон тарга хүч муутай малыг хамгаалах, шаардлагатай бол малаа эдийн засгийн эргэлтэд оруулахыг санууллаа. Отор нүүхээс өмнө хүлээн авах аймаг, сумтай тохиролцож, бэлчээр, ус, мал эмнэлгийн үйлчилгээ, замын нөхцөл, зөвшөөрлөө баталгаажуулах нь зүйтэй. Түүнчлэн хүнс, ус, түлш, эм, холбооны хэрэгслийн нөөц бүрдүүлж, цаг агаарын анхааруулгыг тогтмол дагахыг зөвлөв. Өндөр настан, хөгжлийн бэрхшээлтэй хүн, бага насны хүүхэдтэй өрхүүдэд харилцан туслалцаа үзүүлэх, гамшгийн үед холбоо барих зохицуулалтыг урьдчилан бэлтгэхийг уриалжээ.

скачать dle 12.0

Сэтгэгдэл үлдээх

reload, if the code cannot be seen
Next Post
  • Шинэ мэдээ