ЦЕГ: Чихэр цуглуулж явсан хүүхдийг согтууруулах ундаа хэрэглэсэн иргэн өшиглөсөн

Өнгөрсөн амралтын өдөр "Хэллоуиний баярын чихэр өгөөч" хэмээн хаалга тогшсон охиныг нэгэн иргэн өшиглөж, зодож байгаа бичлэг нийгмийн сүлжээнд тархсан. Энэ асуудалтай холбогдуулан цагдаагийн байгууллага тодруулга өгчээ.

Тодруулгад "2022 оны аравдугаар сарын 29-ний өдрийн 16:48 цагт Баянгол дүүргийн 18 дугаар хорооны нутаг дэвсгэрт “Доод айлын хүн манай хүүхдийн гэдэс рүү өшиглөсөн байна гэх дуудлага цагдаагийн байгууллагт ирсэн. Дуудлагын дагуу тус дүүрэг дэх цагдаагийн газрын нэгдүгээр хэлтэс шалгасан.

Шалгалтаар есөн настай, охин “Н” гэгчийг чихэр цуглуулах зорилгоор доод айлын хаалгыг тогшиход тус байранд оршин суух 56 настай, эрэгтэй “Х” гэгч нь архи, согтууруулах ундааны зүйл хэрэглэсэн үедээ өшиглөсөн тогтоогдсон бөгөөд энэ үйлдэлд шалган шийдвэрлэх ажиллагаа явагдаж байна" гэлээ.