Францад хулгайлагдсан Ренуарын хоёр зургийг хуурамч хананы цаанаас олжээ: Хулгайчид дараагийн музейг бай болгож байсан байж болзошгүй

Зураг: Кань-сюр-Мер дахь Ренуарын музей. MOSSOT / Wikimedia Commons, CC BY-SA 3.0

Францын Ривьерагаас хулгайлагдсан импрессионист зураач Пьер-Огюст Ренуарын хоёр бүтээлийг хувийн байшингийн хуурамч хананы цаанаас олжээ. Прокуроруудын үнэлснээр хоёр зургийн үнэ ойролцоогоор 4.2 сая евро буюу 4.7 сая ам.доллар.

Дөрвөн минут

Есдүгээр сарын 8-нд хулгайчид Кань-сюр-Мер хот дахь Ренуарын музейн хашааг цахилгаан хөрөөгөөр огтолж нэвтэрчээ. Дохиолол дуугарч, цагдаа дөрөвхөн минутын дараа хүрэлцэн ирсэн тул тэд сандарч, төлөвлөсөн дөрвөн зургаасаа хоёрыг л авч чаджээ.

Ингэж «Хатагтай Колонна Романо», «Худгийн дэргэдэх залуу эмэгтэй» бүтээлүүд алга болсон. Харин «Хатагтай Пишон», «Ном уншиж буй Коко» хэмээх үлдсэн хоёр зургийг музейн цэцэрлэгээс хамгаалалтын уутанд хийсэн чигээр нь олжээ.

ДНХ сэжүүр болов

Мөрдөгчид ДНХ-ийн шинжилгээ, гар утасны байршлын мэдээлэл, хяналтын камерын бичлэгийг ашигласан. Зугтахдаа хаяж орхисон цүнхнээс олдсон ДНХ 29 настай гол сэжигтэн рүү хөтөлжээ.

Энэ сарын эхээр зургаан сэжигтнийг баривчилсан бөгөөд 9-ний Баасан гарагт зургуудыг хувийн байшингийн хуурамч хананы цаанаас илрүүлэв. Гол сэжигтэнд зохион байгуулалттай хулгайн хэргээр, зургуудыг нуусан гэх өөр нэг эрэгтэйд хулгайн эд зүйлийг зохион байгуулалттайгаар хадгалсан хэргээр, зургийг худалдаж авахаар хандсан дөрөв дэх сэжигтэнд хулгайн эд зүйл хадгалах, гэмт хэрэгт хуйвалдах хэргээр тус тус ял тулгажээ.

Дараагийн бай бэлэн байсан уу?

Марсель хотын прокурор Николя Бессоны хэлснээр тэд Сен-Поль-де-Ванс дахь Маэгийн санг удахгүй дээрэмдэхээр төлөвлөж байсан гэх хүчтэй сэжиг байжээ. Сэжигтнүүд үүнийг үгүйсгэж байна.

Харамсалтай нь хоёр зураг хоёулаа гэмтсэн бөгөөд «Хатагтай Колонна Романо» урагдсан тул сэргээн засварлах шаардлагатай болжээ. Кань-сюр-Мер хотын захирагч Брайан Массон эдгээр зургийг зөвхөн урлагийн бүтээл бус, хотынхоо түүхийн нэг хэсэг гэж онцолжээ.

Эх сурвалж: Al Jazeera (AFP, AP)