Нийслэлд ирэх онд 22 байршлын авто замын ажил үргэлжилнэ: Нүхт, Ар Зайсан, Санзай

Зураг (Улаанбаатарын авто зам, жишээ зураг): Chinneeb / Wikimedia Commons, CC BY-SA 4.0

Нийслэлийн Замын хөгжлийн газрын дарга Б.Одбаяр "2026 онд нийт 66 байршилд 101 км авто замыг барихаар төлөвлөсөн. Одоогийн байдлаар 44 байршилд ажил дууссан" гэж мэдээллээ. Хучилтыг нь тавьж амжаагүй 22 байршлын ажлыг ирэх оны дөрөвдүгээр сараас үргэлжлүүлнэ.

Одоогийн байгаа замаар саадгүй зорчих нөхцөлийг хангаж, 10 дугаар сарын 30-наас авто замын ажлыг зогсоох тухай мэдэгдлийг гүйцэтгэгч талуудад өгсөн аж. Тухайлбал Нүхтээс Архивын Ерөнхий Газар хүртэлх авто зам, Ар Зайсангийн гудамжны далан дээгүүр саадгүй зорчих боломжийг хангаж байна. Санзайн 1.7 км замд буталсан чулууны үеийг тавьж, нийтийн тээвэр болон автомашин зорчих нөхцөлөөр хангаад хөдөлгөөнийг нээсэн бөгөөд замыг ирэх оны тавдугаар сард барьж дуусгана.

Хороолол доторх болон гол гудамж, магистраль замын засвар, шинэчлэлийн ажил бүрэн дууссан гэв. Гэрээт цагдаагийн албан хаагчидтай хамтран орой бүр талбайгаар явж авто замыг хулгайгаар сэтэлсэн эсэхийг шалгаж, зөрчил гарсан тохиолдолд нөхөн сэргээлт хийлгэж байгаа ажээ. Энэ хяналт 11 дүгээр сарын 30 хүртэл үргэлжилнэ. Мөн 2027 онд нарийвчилсан зураг гаргаагүй авто зам барихгүй гэдгийг тэрбээр хэллээ.

Ирэх онд үргэлжлүүлэн барих замууд

Архивчдын гудамж (Нисэхийн авто зам)-аас эхлэн шинэ суурьшлын бүс болох Нео Сити хотхоныг дайран Нүхтийн авто замтай холбогдох 2 км зам. Төсөвт өртөг нь Нийслэлийн Авто Замын Сангийн ₮11.7 тэрбум.

Хан-Уул дүүргийн 11 дүгээр хороо, Тэнгэр рашааны гудамжнаас Хүмүүн сургуулийн зүүн урд талын Ар Зайсангийн гудамж хүртэлх 780 метр шинэ зам. Төсөвт өртөг ₮2.7 тэрбум.

Сүхбаатар дүүргийн 19 дүгээр хороонд Санзайн автобусны эцсийн буудлаас Багабаян амралтын газар хүртэлх 1.7 км замын шинэчлэл. Үүнд ₮3.1 тэрбум төгрөг зарцуулна.