УИХ-д Улсын дээд шүүхийн шүүгчид нэр дэвшигч З.Ганзоригийг танилцууллаа

Зураг (Улаанбаатар дахь Төрийн ордон): xiquinhosilva / Wikimedia Commons, CC BY 2.0

УИХ-ын намрын ээлжит чуулганы нэгдсэн хуралдаан 2026 оны 10 дугаар сарын 29-нд Төрийн ордонд эхэллээ. Хуралдааны эхэнд Шүүхийн ерөнхий зөвлөл Улсын дээд шүүхийн шүүгчид нэр дэвшигч З.Ганзоригийг танилцуулав.

Нэр дэвшигчийн намтар

З.Ганзориг 1985 онд Булган аймгийн Булган суманд төрсөн. Тэрбээр 2003-2008 онд МУИС-ийн Хууль зүйн сургуулийг эрхзүйч мэргэжлээр төгсч, 2016-2018 онд тус сургуульд хууль зүйн ухааны магистрын зэрэг хамгаалжээ.

Ажлын гараагаа 2007-2008 онд Булган аймгийн шүүхийн тамгын хэлтэст шүүгчийн туслах, шүүх хуралдааны нарийн бичгийн даргаар эхэлсэн. 2009-2010 онд Нийслэлийн захиргааны шүүхийн тамгын хэлтэст мөн адил албан тушаалд ажиллажээ. 2010 оноос Юнител компанийн захиргаа удирдлагын газарт гэрээний мэргэжилтэн, 2010-2014 онд Хаан банкны хуулийн хэлтэст хуулийн зөвлөхөөр ажилласан байна.

Харин 2014-2023 онд Говьсүмбэр аймаг дахь Захиргааны хэргийн анхан шатны шүүхийн шүүгч, 2023 оноос Захиргааны хэргийн давж заалдах шатны шүүхийн шүүгчээр ажиллаж байна.

Гишүүдийн асуулт, нэр дэвшигчийн хариулт

Танилцах үеэр УИХ-ын гишүүд түүний намтар дахь хувийн байгууллагад ажилласан учир шалтгааныг тодрууллаа. Хариуд нь З.Ганзориг 2012 онд Шүүхийн тухай багц хуулийг шинэчлэн батлахад шүүгчийн туслахыг шүүгч болгохгүй зарчим хэрэглэж байсныг сануулав. Хуульчаар сурсан хүний хувьд шүүгч болох мөрөөдөлтэй байсан тул энэ боломжийг олохын тулд шүүхээс гарсан гэж тэрээр тайлбарлалаа. Шүүгчийн ажил зөвхөн техникийн ажлаас илүүтэй хууль хэрэглэх чадвар шаарддаг, компанийн хуульчаар ажилласнаар тэр чадварыг олж авч болно гэж үзсэн аж. Тэрбээр 2014 онд шалгалт өгөөд шүүгч болсон.

Хаан банк, Юнител хоёр хуулийн этгээдэд ажиллаж байсан ч одоо тэнд ажиллаж буй хүмүүстэй харилцаа холбоогүй, ашиг сонирхлын зөрчил үүсэх нөхцөл байхгүй гэдгийг хариуцлагатайгаар хэлсэн байна.

УИХ-ын чуулганы хуралдааны дэгийн тухай хуульд заасны дагуу нэр дэвшигчийг УИХ-д танилцуулсан тухай Шүүхийн ерөнхий зөвлөлд албан ёсны бичгээр мэдэгдэх юм.