Орон сууцны залилангийн 173 хэрэгт 2,208 иргэн хохирогчоор тогтоогдож, хохирол ₮173 тэрбумд хүрчээ

Зураг (Улаанбаатарын Ярмаг орчмын шинэ барилгууд, жишээ зураг): Chinneeb / Wikimedia Commons, CC BY 4.0

Орон сууцны залилах гэмт хэргийг мөрдөн шалгах дэд ажлын хэсэгт ₮173 тэрбум төгрөгийн хохиролтой 2,208 иргэний хэрэг бүртгэгдээд байна. Энэ тухай Цагдаагийн Ерөнхий Газрын Мөрдөн байцаах албаны дарга, хурандаа Н.Мишигдорж танилцууллаа.

Тэрбээр энэ оны эхнээс улсын хэмжээнд 41,441 гэмт хэрэг бүртгэгдсэнээс 13,371 нь залилах гэмт хэрэг байсныг, өөрөөр хэлбэл гурван хэрэг тутмын нэг нь залилан болохыг дурдсан.

Орон сууцны залилах гэмт хэргийг мөрдөн шалгах дэд ажлын хэсэг долдугаар сарын 21-нд байгуулагдсан. ЦЕГ-ын даргын тушаалаар 40 алба хаагчтай ажлын хэсэг томилогдож, хохирсон иргэдийн эрхийг хамгаалах чиглэлээр ажиллаж байна.

Хэргийн дүн

86 хуулийн этгээдэд холбогдох орон сууцны 3,990 гэрээ байгуулсан иргэдийн ₮173 тэрбумын хохиролтой 173 хэрэгт хэрэг бүртгэл, мөрдөн байцаалтын ажиллагаа явуулж, 2,208 иргэнийг хохирогчоор тогтоожээ. Үүнээс 117 хэргийг шийдвэрлэсэн бөгөөд 56 хэрэг үлдсэн. Үлдсэн хэргийг арванхоёрдугаар сарын 10-ны дотор багтаан шийдвэрлэхээр ажиллаж байна.

Шийдвэрлэлтэд олон хохирогчтой, ажиллагаа ихтэй байгаагаас гадна эдийн засаг болон аудитын дүгнэлт хүлээгдэж буй нь нөлөөлж байгаа аж. Тухайн компани хэдэн иргэнээс хэчнээн төгрөг төвлөрүүлсэн, орон сууцандаа хэдийг оруулсан, иргэдээс төвлөрүүлсэн мөнгийг зориулалтын дагуу зарцуулсан эсэхийг шинжээч, аудитаар тогтоолгож байна.

Оргосон этгээд, битүүмжилсэн хөрөнгө

173 хэргийн явцад оргон зайлсан, хаана байгаа нь тогтоогдоогүй сэжигтэй 30 этгээд байсныг олж тогтоожээ. Дөрвөн этгээдийг Интерполын Хөх булант зарлалд оруулсан бол хоёр этгээдийн хаягийг тогтоохоор Улаан булант зарлуулахаар Улсын Ерөнхий прокурорын газарт хандсан байна.

Хохирлыг нөхөн төлүүлэх зорилгоор 5.9 тэрбум төгрөгийн үнэ бүхий үл хөдлөх хөрөнгө, 11 тээврийн хэрэгслийг битүүмжилж, холбогдох аж ахуйн нэгж болон сэжигтэн, яллагдагчийн 28 дансны шилжилт хөдөлгөөнийг хязгаарлажээ. Мөн нэг хуулийн этгээдийн эрх шилжүүлэх бүртгэлийг хязгаарласан.

Орон сууцыг давхардуулж олгох зэрэг залилангаас урьдчилан сэргийлэхийн тулд хуулийн нэмэлт өөрчлөлт санаачилсан бөгөөд батлагдвал ийм төрлийн хэргийг таслан зогсоох нөхцөл бүрдэнэ гэж үзэж байна.