Замын хөдөлгөөний аюулгүй байдлын тухай хууль зөрчсөн 7.8 сая зөрчил бүртгэгдэв

Зураг (Улаанбаатарын цагираг замын орчим орой гарсан замын хөдөлгөөн): Yaan / Wikimedia Commons, CC BY-SA 3.0

Прокурорын байгууллагаас “Зөрчлийн бүртгэл, мэдээллийн нэгдсэн сан”-д бүртгэгдсэн Зөрчлийн тухай хуулийн 14.7 дугаар зүйлд заасан “Замын хөдөлгөөний аюулгүй байдлын тухай хууль зөрчих” зөрчлийн гаралтыг судалж, Улсын Ерөнхий Прокурорын Газар дүнг мэдээллээ.

Энэ оны аравдугаар сарын 30-ны байдлаар нийт 7.8 сая зөрчил бүртгэгдсэн нь өмнөх оны мөн үетэй харьцуулахад хоёр дахин нэмэгдсэн байна.

Шийтгэл оногдуулсан байдал

Замын хөдөлгөөний аюулгүй байдлын тухай хууль зөрчсөн нийт 7,861,373 зөрчилд шийтгэл оногдуулжээ. Үүнээс шүүх 25,415 зөрчилд, эрх бүхий албан тушаалтан 7,835,958 зөрчилд шийтгэл оногдуулсан байна.

Хамгийн их гарсан зөрчил

Зонхилон үйлдсэн зөрчлийг авч үзвэл:

• 2,514,888 зөрчил нь замын хөдөлгөөний дүрэмд заасан тээврийн хэрэгсэл байрлан явах журам зөрчсөн;
• 1,501,205 буюу 19.1 хувь нь дугаарын хязгаарлалт тогтоосон өдөр замын хөдөлгөөнд оролцсон;
• 1,069,921 буюу 13.6 хувь нь хөдөлгөөн эхлэх, хөдөлгөөний чиг өөрчлөх, эсхүл эгнээ байр эзлэх журам зөрчсөн зөрчил байна.

Эдгээр гурван төрлийн зөрчил хамгийн өндөр хувийг эзэлж байгааг Улсын Ерөнхий Прокурорын Газраас мэдээллээ.