ДАКАР 2026: Т.Төгсхүслэн залуучуудын олимпоос хүрэл медаль хүртлээ

Зураг (Дакар Арена, Сенегал): Isabelle Lemelin / Wikimedia Commons, CC BY-SA 4.0

Африк тивд анх удаа зохиогдож буй залуучуудын олимпын наадам өнгөрсөн сарын 31-нд Сенегалын Дакар хотноо нээлтээ хийсэн. Нийт 25 спортын төрлөөр 205 орны 2,654 тамирчин өрсөлдөж байна.

Монголын багийн тугчаар оролцсон жүдоч Тунгалагийн Төгсхүслэн хөвгүүдийн 55 кг-ын жинд хүрэл медаль хүртлээ. Энэ жинд 11 жүдоч өрсөлдсөн бөгөөд Т.Төгсхүслэн эхний тойрогт Замбийн Элиша Зимбаг вазари үнэлгээгээр ялсан. Хагас шигшээд Хорватын Йона Зврочд дийлдсэн байна.

Энэ жинд Азербайжаны Ибрахим Талибов алтан медаль, Хорватын Йона Звроч мөнгөн медаль хүртсэн бол Монголын Т.Төгсхүслэн, Замбийн Элиша Зимба нар хүрэл медаль хүртжээ.

Залуучуудын олимпийн түүхэнд Монголын тамирчид өмнө нь ч медаль хүртэж байсан. Анхны наадам 2010 онд Сингапурт болоход чөлөөт бөхийн төрөлд Б.Батцэцэг, гимнастикийн төрөлд Г.Эрдэнэболд нар алт, О.Дөлгөөн жүдогийн холимог багийн төрөлд мөнгөн медаль хүртсэн. Дөрвөн жилийн дараа БНХАУ-ын Нанжин хотод болсон хоёр дахь олимпод чөлөөт бөхийн охидын 46 кг-ын жинд Б.Дөлгөөн мөнгөн медаль авсан. Хамгийн сүүлд 2018 онд Аргентины Буэнос-Айресд болсон гурав дахь наадамд жүдоч Г.Тэмүүжин, Л.Сосорбарам нар мөнгө, чөлөөт бөхийн төрөлд Т.Оюун-Эрдэнэ хүрэл медаль зүүсэн байна.

Цар тахлын улмаас хэсэг хугацаанд хойшлогдсон энэ удаагийн олимпод Монголын шигшээ баг зургаан спортын төрөлд 10 тамирчинтай оролцож байна. Т.Төгсхүслэн багийн медалийн буухиаг үргэлжлүүллээ.